Introdukshon prueba di seguro digital pa vehíkulonan motorisá

Huntu ku otro kompanianan di seguro ENNIA ta introdusí e prueba di seguro digital pa vehíkulonan motorisá. Ku esaki doñonan di outo ta disponé di nan prueba di seguro via nan telefon selular. E proyekto akí a kristalisá riba inisiativa di e diferente kompanianan di seguro i ku aprobashon di outoridatnan.

E prueba di seguro digital ta hasi kòntròl den tráfiko i serka instansianan mas fásil. Forensys, Ontvanger i Polis ta skèn e kódigo QR di e prueba di seguro for di telefon di e asegurado i asina ta disponé mésora di tur dato ku ta pertenesé huntu ku e prueba di seguro. Ku e téknika nobo akí e proseso ta bira mas efisiente i aktual. E koperashon entre kompanianan di seguro i gobièrnu ta kana mihó.

E kompania di seguro ta traha e prueba di seguro i ta manda esaki pa e asegurado via e-mail di manera ku e por download e fásilmente riba su telefon. No tin mester di bai ofisina di e kompania di seguro mas i e prueba di seguro ta aksesibel semper, tambe sin Internèt.

Lo introdusí e prueba di seguro digital pa tur tipo di seguro. ENNIA ta introdusí e prueba di seguro digital den fase, i ta kuminsá ku un periodo di prueba.

Den futuro ta bira posibel pa hasi otro datonan tambe aksesibel via e sistema akí. E kompania di Kòrsou INSight Insurance Platform a desaroyá e sistema akí i lo sigui gui’é tambe.