TA REANUDÁ BENTA DI KARCHI PREPAGÁ MESORA

WILLEMSTAD:-  Bon notisia pa klientenan di Digicel; desde inmediato pòmpnan di Asogas i Copda ta reanudá benta di karchinan di telefon pre-pagá. Digicel i asosashon di pòmpnan di gasolin Asogas i Copda, finalmente a yega na un resolushon.  “Nos ta hopi kontentu ku nos por a yega na otro, mirando interes di tur esnan involukrá- prinsipalmente di e klientenan. Nos por anunsiá ku e koperashon entre Digicel i asosashon di pòmpnan di gasolin Asogas i Copda ta sólido”, di akuerdo ku Sr. Hans Lute, CEO Digicel Dutch Caribbean. Ademas di e 14 pòmpnan di gasolin bou di Copda (Barber, Biesgheuvel, Cas Cora, New Century, Isa Saliña, Isa Juan Domingo, Sta. Maria, Grand Central, Vanddis- Brievengat, Gasparitu, Marie Pampoen, Rio Canario 1 & 2 i Gasora), tambe tin 7 pòmp di Asogas; Pòmpstashon Margrietlaan, Scheidelaar, Pablo Frederik, Parera, Buena Vista, Dèmpel i Tera Kòrá. Manera ta kustumber klientenan por sigui kumpra karchi di telefon na tur 3 establesimentu di Digicel; Megastore na Biesheuvel, na Tesoro Plaza St. Maria i tambe na Brionplein. Tambe serka tur rebendedó di Digicel, Pòmpstashon di CurOil òf serka e mas di 100 establesimentunan ku a keda publiká anteriormente den diferente medionan di komunikashon.  Ademas di bai e diferente sitionan menshoná, tambe por hasi uso di sistemanan elektróniko. Por uza por ehèmpel ‘Credit Me, Credit You’- aki ta na unda por ‘kompartí’ bo krédito ku un amigu òf familiar tambe por manda krédito un pa otro. Pa hasi uso di Credit Me bo tin ku yama *127* + number di selular* + montante #. Por ehèmpel (*127*59991234567*10#). Esaki ta sin gastu adishonal.  Via di ATM di MCB, BDC i Giro Bank. Sistemanan di pagomátiko òf pagafásil (E-Pin). Tambe por bishitá e wepsáit di Digicel http://www.digicelcuracao.com i primi “Services”/ “Top-Up”.