Ta sera 1 establesimentu, pero mesora ta aktivá 70 punto di benta

WILLEMSTAD:  Entrante djaluna awor, Digicel Sta. Maria lo sera su portanan. Di akuerdo ku ehekutivonan na Digicel, e seramentu di nan establesimentu na Tesoro Plaza na Sta. Maria no tin un impakto direkto pa niun trahadó, ni kliente. “Tur empleado di nos establesimentu na Sta. Maria lo forma parti di nos team na Digicel Brionplein òf Megastore na Biesheuvel”, esaki di akuerdo ku Jorge Cuartas, Interim Marketing Manager pa Digicel Kòrsou.  Usuarionan tampoko lo no sinti efekto, ya ku mesora ta aktivá mas di 70 punto di benta stratégikamente ubiká rònt di nos isla, prinsipalmente pa benta di SIM i karchi di telefon.

Servisionan ku usualmente klientenan lo a risibí na Sta. Maria, awor lo por haña na tantu Digicel Brionplein òf Megastore na Biesheuvel. “Entrante djaluna dia 5 di yüni, lo habri 70 punto di benta, gradualmente tur lo risibí un identifikashon di Digicel di manera ku e kliente por rekonosé ku e establesimentu ta un rebendedó outorisá di nos. Lo tin puntonan di benta asta den áreanan di bibienda; fásil i lihé aksesibel pa e klientenan.”, asina Jorge Cuartas a komentá. “Nos a bin ta traha duru pa duna e kliente outoridat kompletu riba su kuenta; e aplikashon My Digicel App ta e asistènt di tur kliente. Por aktivá plan, rekargá krédito i pronto lo agregá e posibilidat pa asta paga resibu for di bo mes telefon na e momentu di bo preferensia.”

Klientenan por akudí na un di e puntonan di benta pa kompra di nan SIM. Ora ku e kliente kumpra un Digicel SIM di 25 florin, e ta risibí 25 minüt di yamada  di Digi-pa-Digi i pa otro proveedor, 25 SMS Digi pa Digi i 250 MB di data. Tuma nota ku tur fasilidat di Pagafasil ta keda vigente.  Digicel ta gradisí pueblo di Sta. Maria pa nan lealtat tur e añanan i ta invitá mesora pa tuma nota di e rebendedó mas serka di nan.