WILLEMSTAD- JULI 2014: E programa di arte ‘Art Rules’ a yega Kòrsou! E programa di arte spesial dediká na hóbennan di entre 13 i 23 aña di edat tin komo meta pa eksplorá  e mente di e artista hóben i enkurashá kreatividat nobo bou di nos hubentud dor di konektá hobenan interesá den arte ku profeshonalnan riba nan tereno. Durante di Art Rules, lo tin tayer pa hóbennan ku lo ser duná dor di artistanan internashonal i e mihó artista/pintornan di Kòrsou, esaki riba tur plataforma- ‘DJ, Dance, Creative Media, Music & Peformance, Theater’ i komo bónus pa tur hóben- e tayer popular ‘Street Art’ ku lo ser duná dor di e famoso duo Haas&Hahn di Favela Paintings. Haas&Hahn a haña rekonosementu internashonal pa nan obranan kreativo ku ta transformá suidatnan rònt mundu. Tur aktividat lo tuma lugá den kurason di Otrobanda na teatro Luna Blou i La Tentashon- esaki durante di 2 siman konsekutivo, kuminsando for di dia 21 di yüli pa 1 di ougùstùs. Dia 2 di ougùstùs, e proyekto aki lo kulminá ku un dia habrí kaminda lo tin un ‘showcase’ di media i presentashon ku hinter pueblo di Kòrsou por atmirá i selebrá. Digicel ta suprayá su kompromiso ku hóbennan di Kòrsou i programanan edukativo ku ta inspirá e hóben na un desaroyo positivo ku por yud’é alkansá un próksimo nivel den nos komunidat. “Nos ta masha kontentu di por pone nos skouder bou di e proyekto aki, na unda ku e mente di e hóben ta keda pone na prueba i asina dun’é un plataforma pa ekspresá su kreatividat. For di un idea komun, krea algu ekstraordinario”, esaki di akuerdo ku CEO pa Digicel Dutch Caribbean, Sr. Hans Lute. Art Rules a keda lansá na 2010 na isla ruman Aruba i a resultá un éksito rotundo i no tin duda ku hóbennan di Kòrsou lo sá di probechá di e oportunidat i partisipá aktivamente. Inskripshon ta habri ahinda i nos ta enkurashá tur interesá pa partisipá. Pa mas informashon por bishitá www.artrulescuracao.com òf bishitá nan página riba Facebook.