Un servicio cu ta pone e experiencia positivo di e turista central

Recientemente Digicel a organisa hunto cu Exceptional Innovation, un evento pa clientenan y futuro clientenan comercial riba e topico “Best in Class Hotel Entertainment Systems”. Representantenan di mas di 20 hotel a atende e encuentro na Alhambra Ballroom, y nan a participa na e presentacion interactivo, na unda  Digicel a presenta un plataforma cu ta completamente diseña pa aplicacion den e industria di hospitalidad.

Digicel ta ofrece actualmente un plataforma cu ta wordo adapta na e hotel su “brand” y ta cubri detayenan relaciona na comunicacion, informacion y contenido pa e huespednan.

E plataforma ta consisti di Live TV, multimedia, video-on-demand y pay-per-view. E ta wordo integra cu e aplicacionnan di PMS di e hotel y otro aplicacionnan cu tin di haber cu hospitalidad. E sistema ta provee in-room messaging, ta ofrece mayornan “parental control”, y e ta integra pago cu cuenta y Google Chromecast.

Cada hotel por controla, diseña y maneha nan mesun layout y integra promocionnan pa nan mesun servicionan y pa servicionan di un partido di p’afo di e hotel, incluyendo golf, SPA, restaurantnan, tournan, museonan, informacion local, y mas.

Digicel ta realisa e plataforma aki hunto cu Exceptional Innovation B.V. (EI), cu ta expertonan riba tereno di desaroyo di software, diseño di hardware y fabricacion. EI ta specialisa tambe den brinda servicionan profesional di diseño, construccion y implementacion di solucionnan pa e mercado di hospitalidad.

E experiencia di e usuario “final”, esta e huesped of cliente di e hotel of compania ta clave den e desaroyo di cada producto y servicio, tanto pa Digicel como EI. E punto central di cada solucion ta un plataforma tecnologico robusto cu ta uza standardnan habri pa desaroyo di aplicacion rapido y integracion eficiente di varios sistema pa crea un experiencia interactivo atractivo pa e cliente of usuario final.

E mision di EI ta pa bira e proveedor global di tecnologia cu ta maximalisa e envolvimento y satisfaccion di huespednan, cu ta realsa e experiencia di entretenimento, y ta aumenta entrada pa medio di entrega di eficiencia den operacionnan di hotelnan. EI tin mas di 30 aña di experiencia y ta opera den mercadonan clave na Merca, Europa, Medio Oriente y Africa, brindando apoyo na mas di 325 mil camber.

Pa mas informacion y un presentacion di e servicio aki, por fabor tuma contacto cu Brian Monpellier na telefon 732-2274.