…61 partisipante a demostrá Inovashon i Kreatividat den promé tanda di I-Factor …

WILLEMSTAD: Tabata djadumingu último ku Innovatie Centrum Curaçao a tene su promé tanda di e kompetensha I-Factor. Den e promé tanda, e partisipantenan mester a presentá nan ideanan dilanti e huradonan; 61 partisipante ku lo batayá pa e gran premio di 7,000,- florin. Durante di e promé tanda di kompetensha, e partisipantenan a haña chèns di bin ku nan simpatisadónan pa apoyá nan miéntras tantu ku nan tabata dunando nan presentashon na hurado. E ambiente tabata tur afó. For di 61 partisipante, a selektá 30 i for di e selekshonadonan, 8 partisipante lo bai pa e tanda final. Huradonan lo hasi nan tarea investigativo i lo kompilá mas informashon pa despues selektá e ganador. Srta. Thessa Fleming, relashonista públiko di Digicel Kòrsou a komentá, “Kreatividat i Inovashon ta koinsidí ku filosofia di nos empresa, na Digicel nos ta kere firmemente den aktitut i pensamentu kreativo, ademas di esei nos ta purba semper di ta inovativo den servisio i produktonan ku nos ta ofresé, pues pa nos sostené un proyekto manera esun di Innovatie Centrum Curaçao ta algu ku nos no mester a pensa dos bes.” E promé seshon di e kompetensha I-Factor di Innovatie Centrum Curaçao a wòrdu grabá i dia 11 di novèmber próksimo lo wòrdu pasá na TeleCuraçao pa tur hende por mira yunan di nos mes tera ku nan inventonan, demostrando kreatividat i inovashon. Digicel ta felisitá tur esnan ku a presentá nan ideanan durante di e promé tanda i ta deseá hopi éksito na e 8  partisipantenan ku a keda selekshoná pa e tanda final.