WILLEMSTAD: Lesamentu di buki ta esensial pa amplia horizonte di grandi i chikitu. Komo un kompania inovador Digicel ke promové lesamentu, hasta si e ta via di medionan digital. Ora ta nesesario pone bo telefon un banda i lesa un buki òf kambia di ‘browser’ i lesa un artíkulo òf buki ‘online’. Un buki digital ta mes bon ku unu konvenshonal; Digicel ke promové lesamentu di buki digital mirando kuantu hóben ta preferá nan telefon. Pues, práktikamente grandi i chikitu por tin nan buki preferí den nan plant’i man. Ademas di esaki, ta importante pa hóbennan konosé nos eskritornan lokal i apresiá nan obra.
180 buki di mucha pa Biblioteka Nashonal Kòrsou
Digicel ta konfirmá tambe un donashon masha spesial na unda ku lo opsekiá biblioteka di Kòrsou 180 buki pa mucha, repartí den 60 buki pa aña, durante 3 aña konsekutivo. CEO di Digicel, Roeland van der Hoeven ta bisa di partikularmente orguyoso di e inisiativa aki, “Lesamentu ta esensial pa un bon desaroyo kognitivo di e mucha. Ademas, dor di lesa e ta amplia su vokabulario i konosementu. Awendia pa haña un mucha lesa un buki por ta un desafio, ta pesei nos ke tòg motivá lesamentu ‘online’ di buki i artíkulonan ku por yuda e mucha òf hóben den su desaroyo personal i su estudionan”.
Apertura “Ban lesa i deskubrí Kòrsou”
Digicel ta duna sosten na Siman di Buki ku e tema “Ban lesa i deskubrí Kòrsou” i lo patrosiná e apertura na Sambil. Esaki lo tuma lugá riba djabièrnè dia 25 di òktober benidero. Riba e dia aki, 15 eskritor lokal lo lesa nan propio bukinan. E eskritornan lo keda repartí den 4 skina stratégiko den e sentro komersial i ta invitá mayornan pa bishitá e evento ku e muchanan.
Lesamentu di buki ku Crisèn Schorea i Diana Lebacs na Digicel Brionplein
Djamars dia 29 di òktober próksimo entre 4’or i 5’or di atardi Digicel lo ta anfitrion di dos eskritor lokal, Crisèn Schorea i Diana Lebacs. Ámbos eskritor lo usa tantu e buki den su forma tradishonal i digital via di un tablèt pa lesa kuentanan popular. Ta invitá mayornan pa keda pendiente di e página di Facebook di Digicel pa mas detaye. E ‘Atardi di Kuenta’ na Digicel Brionplein ta grátis pa tur mucha. Pa mas informashon por bishitá www.digicelcuracao.com