WILLEMSTAD; Tabata djasabra último ku Digicel Kòrsou a sostené atletanan di Special Olympics den un akshon pa rekoudá fondo pa partisipashon di Kòrsou na e weganan olímpiko ku próksimamente ta tuma lugá. Durante di e akshon a bende 3 diferente tipo di boton, kada un ku un mensahe di inspirashon kreá dor di e propio tim di Special Olympics Curaçao. Un tim kombiná di empleadonan di Digicel Kòrsou, figuranan públiko i atletanan spesial a purba bende mas tantu boton ku ta posibel i asina rekoudá fondo pa representashon di Kòrsou na weganan olímpiko Los Angeles California entre 25 di yüli i 2 di ougùstùs próksimo. E tim tabata na Digicel Megastore na Biesheuvel, Mensings Caminada, Goisco, Albert Heijn, Cost U Less i Mangusa.

E akshon di djasabra último a rekoudá un total di Fl.2295. Di akuerdo ku sr. Hans Lute, Direktor pa Digicel Kòrsou,“Nos ta masha kontentu di por a kontribuí un biaha mas ku Special Olympics. Nos ta pendiente pa e di dos aktividat pa rekoudá fondo, promé ku e atletanan biaha. Nos ta gradisí tur ku di un òf otro manera a pone nan skouder bou di e proyekto. Un danki spesial na henter komunidat di Kòrsou pa nan kontribushon”. “Digicel Kòrsou su aporte na atletanan di Special Olympics ta kontinuo. E atletanan di Special Olympics semper a forma parti di e aktividatnan, kampañanan i trabounan komunitario di Digicel, pues un donashon adishonal sigur ta na su lugá. Nos ta deseá nos atletanan spesial hopi kurashi i ku nan ta eksitoso den kada intento”, asina sr. Hans Lute a finalisá.

Digicel ta gradisí diferente figura públiko pa yuda den e rekoudashon di fondo; Mason, Tahnee Jane, Dj Ro1 i tambe partisipantenan di Miss Teenager Juraighy Julia, Titiana Curie, Sheena Rijsenburg, Kelly Theunissen, Selena Isenia,  Alexandra Bomberg i Jaidy Gomez pa di forma genuino hasi donashon di nan tempu pa yuda rekoudá fondo pa Special Olympics Curaçao.