Comparti mas e Pasco aki!

ORANJESTAD: Esencia di Pasco ta pa nos comparti cu otro, den fin di siman ultimo Digicel Aruba a haci netamente esey conhuntamente cu organisacion non-profit Hand 4 Addicts y Donovan Henriquez. Di acuerdo cu Thaina Maduro, Marketing Executive pa Digicel Aruba e proyecto aki ta cuadra perfectamente cu nan responsabilidad social como empresa na Aruba.  Hands 4 Addicts por funciona unicamente cu donacion. Un biaha pa luna nan ta bishita e area banda di Hotel Central y ta hiba paña, sapato, cuminda, co’i bebe y awa limpi pa esunnan cu tin problema di adiccion.

Diasabra mainta, Donovan Henriquez mihor conoci como Don The Barber a pela tur e adictonan cu ta frecuenta e area y empleadonan di Digicel y hunta di directiva di Special Olympics a sirbi un plato navideño provee dor di Peanuts Restaurant consistiendo di ayaca, ham di Pasco y tambe un dessert. “Nos kier a biba e esencia di Pasco cu nos coleganan haciendo algo bek pa nos comunidad y pa esunnan mas vulnerabel tambe. Adiccion ta un enfermedad, y pa hopi di e personanan cu  ta frecuenta e area di Hotel Central e ta dificil pa haña un cura, pero esey no ta nifica cu ta exclui nan for di nos comunidad. Esey ta un di motibonan tambe cu Digicel Aruba a sostene e iniciativa aki di Hands 4 Addicts. Nos kier promove creacion di un mundo na unda niun hende ta wordo laga atras; mester tin inclusion. E team boluntario di Hands 4 Addicts sigur merece un elogio pa nan trabou y dedicacion na e bunita causa. Esaki sigur tabata un proyecto extraordinario cu a toca tur esunnan envolvi”,  asina Thaina Maduro a indica.

Pa mas informacion of un donacion na Hands 4 Addicts por bishita facebook.com/hand4addicts/ Riba fotonan adhunto un imprecion di e proyecto navideño di Hands 4 Addicts diasabra ultimo. Digicel Aruba ta invita nos comunidad pa celebra fin di aña hunto cu nan i for di awor ta desea henter comunidad Arubano un feliz Pasco y un prospero Aña nobo!  Pa mas informacion bishita www.digicelaruba.com