WILLEMSTAD:  Ademas di ta e kompania di komunikashon di mas grandi riba nos isla, Digicel ta kontribuí na e komunidat den kual nan ta operá. E aña aki Digicel ta duna su aporte na ‘Curaçao Color Walk 2015’ organisá pa JCI i Ernst and Young. Lema di e kaminata ta ‘Color your live by coloring others’. For di su promé aña, e kaminata a bira popular dor di su estilo úniko i bunita kousa. Ya karchinan ta kompletamente bendí.  Digicel lo ta patrosinando e di dos ‘color station’ riba e ruta representando e koló lila.  E koló lila of violeta, ta un koló ku ta inspirá ideanan genuino, positivismo i spiritualidat. Ademas di esaki e koló lila, ta inspirá movementu. Sigur algun sentimentu ku nos por motivá otro kuné na Kòrsou den 2015.

Den tipo di eventonan asin’aki Digicel ta suprayá su kompromiso ku komunidat. “Nos kompania ta aportá na e kousa i ta p’esei mes a duna oportunidat na tur trahadó ku ke partisipá pa registrá. Algu mas ku 100 trahadó a  registrá pa djadumingu awor nan tambe partisipá. Pa un dia, nos lo kambia nos tradishonal koló kòrá pa e koló lila- tur esaki pa un bon kousa”, esaki di akuerdo ku Shayenne Rock, marketing manager pa Digicel Kòrsou. Digicel ta kòrda públiko ku e ‘Curaçao Color Walk 2015’ ta sali i tèrminá na Parasasa Beach. Lo kuminsá ku un kalentamentu 6:30am pa despues duna inisio na e kaminata 7’or di mainta. Na final di e kaminata lo tin un ‘after party’ ku Dj Lucy i Mc Hyper. “Curaçao Color Walk 2015 ta duna komunidat e oportunidat di ta den moveshon i alabes yuda un otro ku ta den nesesidat. Nos ta felisitá e organisashon pa un evento ku ta premirá di ta sumamente eksitoso”, asina Shayenne Rock di Digicel a tèrminá.