… entrante 24 di yüni por kuminsá hasi donashon na Digicel Biesheuvel …

WILLEMSTAD: Ya kaba ta asina leu ku a kuminsá prepará pa e próksimo evento di Bario Ekstraordinario, relashoná ku esaki a tene un konferensha di prensa na Digicel Biesheuvel pa introdusí e proyekto na komunidat di Kòrsou. “E idea di e proyekto Bario Ekstraordinario ta pa duna bèk na nos komunidat, esaki nos a bin ta hasi den forma eksitoso i e biaha aki nos ke involukrá nos komunidat aún mas den e proyekto”, asina Thessa Fleming, relashonista públiko, di Digicel Kòrsou a duna di konosé durante di e konferensha di prensa. Mas aleu a sigui splika ku lo ta yudando sinku orfanato e.o Kinderoorden Brakkeput, Kas Broeder Pius, Casa Manita, Huize Sint Jozef i Huize Rose Pelletier. Den e proyekto aki Digicel i nos komunidat lo ta yudando un total di 250 mucha/ hóben di entre 4 i 20 aña di edat, inkluyendo baby i resien nase. Kuminsando djaluna dia 24 di yüni te ku dia 28 di yüni próksimo Digicel lo tene un ‘food drive’ na benefisio di e kasnan di kuido infantil/ hubenil i ta invitá nos komunidat pa yuda den esaki; por hasi donashon di kuminda den bleki, kos di bebe i produktonan di limpiesa i higiena na Digicel Biesheuvel. Pa fasilitá e donashon di parti di nos komunidat, Digicel su promo team lo aseptá donashon di kuminda den bleki dia 29 di yüni na Mangusa Hypermarket, Mangusa Rio Canario, Albert Heijn, Esperamos i Vreugdenhill entre 9’or di mainta i 6’or di atardi. Algun di e produktonan ku lo por hasi donashon di nan ta; lechi, keshi, Choco Pasta, Juice, buskuchi, pudin, chips, djèm, pindakas, papa brinta, saku di aros, berdura den bleki, fruta den bleki, sòpi kontinental, zeta di kushina, pasta di tomati pa kushina, hariña pa kushina, lechi kondèns. Produktonan di limpiesa i higiena : Deodorante, habon pa baña, skeiru di djente, pasta di djente, shampu, krema pa kurpa, puiru, papel di wc, kotèks, papel pa den kushina, klòròks, disicline, pèmper pa baby S1 S2 S3. Klousurando, Thessa Fleming relashonista públiko, di Digicel Kòrsou a komentá ku ta e deseo máksimo di Digicel pa involukrá henter nos komunidat den e bunita obra aki, “No laga esaki ta esfuerso di un kompania só, sino laga nos uni pa hasi un diferensia den bida di esnan mas vulnerabel den nos komunidat- esta, nos muchanan”. Pueblo di Kòrsou ta invitá pa entrante dia 24 di yüni hasi donashon di kuminda den bleki, kos di bebe i produktonan di limpiesa i higiena na Digicel Biesheuvel. Riba fotonan athuntu momentu di e enkuentro ku prensa.