Danki na tur ku a yuda hasi Playa Canoa i e kaminda pa Ronde Clip limpi limpi!

WILLEMSTAD-SEPT: “Nos ta habri siman ku hopi satisfakshon; e partisipashon di Digicel na e proyekto di Curaçao Clean Up tabata un éksito total”, esaki di akuerdo ku relashonista públiko pa Digicel Kòrsou, Thessa Fleming. Un grupo di mas di 60 persona, konsistiendo di empleadonan, famia i amigunan di Digicel a partisipá djasabra último na e akshon di limpiesa ku a keda tene na Playa Canoa i e kaminda ku ta kondusí na Playa Canoa for di Brievengat. For di 8’or di mainta e grupo a reuní ku un solo meta, esta di limpia e sitio i besindario limpi limpi! E grupo a limpia e área adoptá pa Digicel te ku tra’i mèrdia i a produsí un kantidat enorme di sakunan di sushi. Komentarionan general di e boluntarionan ku a yuda Digicel durante di e limpiesa tabata unánime; “Nos mester aportá na un medioambiente mas sano i mantené sitionan manera Playa Canoa liber di sushedat”. Mas aleu, Thessa Fleming di Digicel Kòrsou ta splika ku e área tabata práktikamente un dùmp públiko na unda ku públiko tabata depositá sushi di kas, material, artefaktonan i te hasta outo. Na tur, boluntarionan rònt Kòrsou a logra piki i akumulá un total di 485.290 kilo di shushi den 4 ora. Esaki ta un demostrashon chikitu di kiko tur nos por logra si nos uni pa krea un Kòrsou mas limpi i positivo. Manera ku ya kaba a splika previamente, via di e proyektonan di Bario Ekstraordinario, Digicel ke motivá nos komunidat pa krea un sentimentu komunitario i yuda otro p’asina huntu nos por tin un mihó komunidat, esei tabata e motivashon tras di e aporte komo empresa na e akshon di Curaçao Clean Up. Digicel ta felisitá i yama danki na Curacao Clean Up pa por a duna nan e oportunidat pa forma parti di e inisiativa aki. Riba fotonan athuntu, por mira momentu ku e akshon di limpiesa ta tumando lugar na e área di Playa Canoa i besindario dor di e team sumamente entusiasmá di Digicel durante di e Curaçao Clean Up!