Un aporte importante na un fundashon hopi stimá den nos komunidat

WILLEMSTAD; Resientemente Digicel Kòrsou a renobá su patrosinio ku Special Olympics, di e forma aki siguiendo un tradishon ku e kompania tin- no únikamente na Kòrsou sino den kasi tur merkado na unda e tin su operashonnan. E atletanan di Special Olympics semper a forma parti di e aktividatnan, kampañanan i trabounan komunitario di Digicel. E kompromiso di e kompania pa ku Special Olympics ta unu duradero. E aña aki, Digicel Kòrsou ta pone un montante di NAf 20,000 disponibel pa e organisashon.

E fondonan ku Digicel ta aloká tei pa yuda e organisashon den nan aktividatnan sosial, deportivo i di formashon komunitario. Digicel Kòrsou su patrosinio na Special Olympics ta bai kompañá ku un laso di koperashon ku ta keda sostené den transkurso di henter e aña. Durante di un momentu spesial djamars último na Digicel Biesheuvel a interkambiá regalo komo muestra di apresio- di ámbos banda. “Nos ta masha orguyoso di e atletanan spesial i ku plaser ta yuda e organisashon. Nan esfuersonan na e último ‘World Games’ na Los Angeles a keda koroná ku diferente medaya. E meta prinsipal tras di un patrosinio asina signifikante ta pa brinda e atletanan oportunidat di desaroyá den forma positivo i kultivá un deseo pa sobresalí den nan deporte. Digicel ta pendiente pa selebrá e fin di aña aki di un manera spesial ku Special Olympic, ta invitá nos komunidat pa keda pendiente”, esaki di akuerdo ku marketing manager pa Digicel Kòrsou, Shayenne Rock.

Riba fotonan athuntu por haña un impreshon di e momentu ku e donashon na Special Olympics a keda realisá na Digicel Megastore na Biesheuvel. Sr. Sten van der Ham enkargá ku maneho diario di Digicel Kòrsou i sra. Shayenne Rock, marketing manager pa Digicel Kòrsou a entregá e chèk na representante- i atletanan di Special Olympic Curaçao.