WILLEMSTAD, Mart 2016: Digicel a anunsiá awe ku e’la firma un akuerdo di atkisishon ku TRES Networks. Suma no a keda divulgá. Pendiente pa aprobashon di gobièrnu, Digicel lo traha huntu ku e gerensia aktual pa trese mas i mihó servisio pa klientenan na Kòrsou.

TRES Networks ta un operador di telekomunikashon pa liña fiho i di largu distansia, tambe e ta distribuidor di televishon digital i servisionan di entretenimentu na Kòrsou. Nan ta proveé klientenan residensial i empresarial ku servisio avansá di ‘high speed’ Internet , ‘voice’ i servisionan digital-  esaki rònt Kòrsou. Ademas, komo e promé i úniko proveedor usando un ret 100% ‘fibre optic’, TRES Networks ta sostené Digicel su focus den yuda klientenan empresarial kompetí den merkado dor di duna nan e mihó solushonnan ku teknologia avansá tin di ofresé.

“TRES ta satisfecho di por a yega na un akuerdo ku Digicel, un kompania ku un marka sólido ku lo fortifiká e nivel haltu di ekspertisio di e operashonnan di TRES. Tambe, via di nan posishonamentu i forsa den merkado di Kòrsou nan lo ekspandé e ret di TRES den forma rápido, mehorá servisionan i riba tur kos, alkansá e potensial grandi ku TRES tin,” esaki di akuerdo ku Frank de Frémery, CEO TRES Networks.

Sten van der Ham, CEO di Digicel Kòrsou a komentá, “E atkisishon di TRES Networks ta hasi ku nos por sigui invertí den konstrukshon di nos ret di fibra óptiko rònt Kòrsou i asina duna nos klientenan eksperensianan superior i posishoná Kòrsou riba promé plano di teknologia den Karibe.”