WILLEMSTAD: Resientemente Kòrsou a inougurá su promé “Smart Bus Stop”. ITS Caribbean & Latin America, diseñadó di e bòrchi di bùs digital a skohe Digicel komo su partner pa proveé konektividat i teknologia vital di manera ku e por funshoná sin interupshon. E bòrchi di bus digital ta hasi trafikashon ku transporte públiko mas sigur i plasentero miéntras ku e ta mantené usuarionan informá di e yegada di konvoi i ta pèrmití nan akseso na internèt grátis.

E asina yamá “Smart Bus Stop”, ta ekipá ku pantayanan LED i ta figurá ku un aplikashon di ‘Autobusbedrijf Curaçao’ (ABC) ku ta mustra usuarionan di transporte públiko e ora di yegada, otro informashonnan relashoná ku ruta di konvoi, i ta te asta pèrmití e usuario pa plania su biahe.

Na e bòrchi di bùs digital pasaheronan por disfrutá di ‘background music’, internèt grátis i ta pèrmití pa karga nan aparatonan elektróniko. Un inovashon realmente interesante ta e karakterístikanan di seguridat, manera e boton di pániko, un kámara di seguridat i sufisiente iluminashon ku ta hasi trafikashon den transporte públiko hopi mas seif pa e pasahero.

Ademas, e ta fungi komo un base pa e sensor di un asina yamá ‘Smart City’ ku ta wòrdu usa pa kolekta data pa análisis di tráfiko, konteo di peaton i vehíkulo, detekshon di velosidat, rekonosementu di plachi di number, vibrashon di kaminda, e tin sensor pa aksidente i por hasta sirbi pa monitor kalidat di aire. Den kaso di un emergensia, e ta komuniká ‘real time’ ku e plataforma di ITS, i outoridat ta keda notifiká inmediatamente i outomátikamente. E parti eksterior ta usa pènel solar, i tin ‘un back-up’ di koriente.

Tur e teknologia aki ta konektá via Digicel su ret potente di 100% fibra óptiko ku ta ofresé e konfiabilidat i spit nesesario pa garantisá ku e bòrchi di bùs digital ta operashonal sin interupshon. Digicel a adoptá e bòrchinan di bùs komo sosten na e proyekto aki di ITS ku ta brinda un avanse teknológiko sin presedente. Esaki ta djis un di e pasonan pa elevá Kòrsou mediante ICT, mehora kalidat di bida di nos suidadanonan i ekshibí nos pais komo un lider teknológiko den Karibe, i region.