Hende muhé por sobresali den un industria ku tradishonalmente ta dominá pa hende hòmber:

WILLEMSTAD:  Djamars último Digicel a organisá un dia riba kual a informá mucha muhénan di entre 16 pa 20 aña di un karera den ICT.  E grupo di mucha muhé a risibí un introdukshon teorétiko di ICT pa despues hasi un paseo den instalashonnan di Digicel na Biesheuvel i konkluí e parti práktiko.  Di akuerdo ku Lee Singh  Digicel su Sales Manager ICT, nan ta deseá di krea mas oportunidat den ICT pa hende muhé na Kòrsou. No tin limite na loke un hende muhé ta deseá di alkansá den su bida. Tin un futuro prometedor den ICT pa e hende muhé di generashon nobo.”

E grupo di mucha muhé ku a partisipá na e dia di ICT a keda reklutá na diferente skol i tambe via un invitashon habrí ku Digicel a hasi riba social media. Pa enkurashá mas hende muhé den e ramo di ICT, Digicel a krea un programa spesial den nan departamentu di ICT. Pa awòki, únikamente e grupo di mucha muhé ku a partisipá na e ‘Dia di ICT’ di djamars último por apliká via email motivando ta dikon nan ta e mihó kandidata. Lee Singh ta komentá ku e ta masha impreshoná pa e kapasidat di e promé grupo di mucha muhé  ku a partisipá. “Nan tabata hopi motivá i a demostrá hopi potensial.  Mi ta enkurashá kada un di nan pa laga nan pashon bira nan propósito, i un dia kisas nan profeshon.”

E desaroyonan di ICT den merkado di Kòrsou ta remarkabel i ta demostrá kresementu kontinuo pa Digicel. Esaki partikularmente ta nifiká ku Digicel ta muchu mas ku un proveedor di telekomunikashon; pero ta ofresé solushonnan den efisiensia pa tur nesesidat riba tereno di ICT tambe. E industria di IT/ICT na Kòrsou ta kresiendo rápidamente; Digicel ta sostené e dama ‘young professional’ ora nan kuminsá un karera den IT/ICT. E meta di Digicel ta pa enkurashá e hende muhé pa tuma ròlnan aktivo den desaroyo di ekonomia global i pa tuma desishonnan importante ku por tin un impakto direkto den desaroyo di kualke empresa.