Sigi charlanan interesante, gana premio i bira mas konsiente dia 15 di yanuari 2017

Willemstad, – Ku hopi enthousiasmo nos por informá ku nos sponsor prinsipal MCB ta huntu ku nos pa ‘count down’ pa dia 15 di yanuari 2017.  Na Colon den lokalidat di Fundashon Alton Paas, e fundashon a tene un rueda di prensa pa anunsia e spònsòrnan. Risibi premio pa ku e Annual Fitness Challenge i tambe informá tur loke ta bai tin dia 15 di yanuari 2017. Ta konosí kaba pa di 4 aña ku Fundashon Alton Paas ta kuminsá aña den gran forma organisando su fundraising annual The Annual Fitness Challenge 2017 na International School i e bia aki lo bai tin 3 aria. Aria 1 ku ta Fitness, Aria 2 ku ta Spinning i Aria 3 ku ta Exhibition.

Tur aña e atenshon tabata riba e seshonnan di fitness ku lo sosodé na e aria 1 den Auditorium kaminda lo tin e 8 tipo di fitness. E aña ki lo tin 3 sekshon speshal ku ta TaiChi pa 60+, Kids Dance pa hoben entre 8 pa 15 aña i Pump on wheels pa personanan den ròlstul.

Na e Aria 2 di Spinning ku ta riba e plenchi ariba ku e ‘spinbikes’ ku kompanianan ta registrá i kontribuí pa partisipá komo grupo.

Un aria interesante e biaha aki ta nos Aria 3 di Exhibition kaminda diferente organisashon lo tei ku stènt pa duna informashon i laga será konosi ku nan produktonan di salu. Nos lo tin tambe charlanan interesante tokante matanan kurativo duna pa Reinald Leitu ku mas di 13 aña di eksperensia riba e topiko biba salu. Tambe Olga Job kual ta un Entrenador sertifiká riba e tereno di salu holistiko. E lo tei ku un konsepto nobo na Kòrsou titulá ‘Mindfull Fitness’ pa siña kon nos por usa nos mente durante di fitness pa yega na un mihó resultado.

Esaki ta nifika ku un persona por bin move pero tambe sea después òf promé ku su seshon e por sinta i skucha e informashonnan aki pa enrikese su konosementu pa un estilo di bida saluabel. Asta mayornan ku trese nan yunan pa fitness por sigi e charla. Pesei komo Fundashon nos a skohe si un persona ke sigi un charla e por bini kompletamente gratis. Esei ta nifiká e por bini na Internashonal School drenta na e parkeerplaats, kana na e stènt nan i skucha workshop. Si e persona ke partisipá e mester kumpra karchi pa e haña su banchi pa drenta den auditórium.

Pa partisipantenan ku a kumpra karchi i partisipá na fitness nos lo tin premio tremendo ku lo keda rifa e dia ei. Pesei 15 di yanuari 2017 ta brinda e espasio ku komunidat por uni ku Fundashon Alton Paas pa kuminsa 2017 den gran forma i alaves kontribui den e trabounan ku e Fundashon ta hasiendo. Pa e schema ku tur e orarionan por wak den korant òf subi Facebook page di Fundashon Alton Paas pa bo por skohe foi ki ora bo ke tei. Tin koi kome plus koi bebe. Asta Finchi Statie i Shirley Bloem-Engelhardt lo tei komo MC pa animá hinter e aktividat masha dushi mes.

Fundashon Alton Paas ta hasi un invitashon na rònt Kòrsou pa bini dia 15 di yanuari na International School entre 6or di mainta pa 12or di merdia. Karchinan ta optenibel serka fundashon mes, na Mensing Caminada i online via Tickets Caribbean. Pa adulto ta 35 florin. Hoben (8 pa 15 aña) i 60+ ta 15 florin. Pa Spinning gruponan of organisashon por yama nos na 5100087 òf 7363577 pa hasi registrashon pa spinning of mail nos na fitness@fundashonaltonpaas.org of info@fundashonaltonpaas.org.