WILLEMSTAD – E kantante, outor di letra i kompositor Gilbert ‘Dibo D’ Doran huntu ku e pianista, kompositor i areglista Randal Corsen ta na punto pa bolbe lansa un proyekto inovativo den e arena musikal. No únikamente nan ke demostrá ku músika no tin límite, pero nan ke sigui tambe halsa i duna honor na nos mes músika i nos idioma Papiamentu. ‘Muzik sin Barera’ ta e siguiente proyekto dje duo.

For di e konsierto di 100 aña MCB na 2016 Dibo D i Randal Corsen a desplegá diferente proyekto i produkto huntu, kada un ku éksito. Huntu nan a bai ku e título máksimo di Festival di Tumba 2019 ku a pone ku Dibo a bira Rei di Tumba ku Randal komo su areglista i direktor musikal. A sigui mas produkto i presentashon, tambe ku Randal su banda RCO i Dibo su banda ONE Flavaz.

E produkshon konhuntu nobo, ‘Muzik sin Barera’, ta konsistí di grabashon di un kantidat di tema; algun original di Dibo i Randal mes, pero tambe algun tema klásiko. Por ehèmpel, a graba un tema di Rudy Plaate i a buta algun poema di Dibo su opa Gilberto ‘Beti’ Doran riba muzik. Den e proyekto aki Dibo i Randal a meskla influensianan di muzik popular ku muzik kontemporaneo, kreando un zonido fresku i nobo. E públiko ta haña un meskla/fushon entre ritmonan di Kòrsou pa skucha ku muzik klásiko, jazz, latin, urban i pòp.

Gran parti di e grabashon a tuma lugá na e prestigioso Power Sound Studios na Amsterdam, kaminda grabashonnan pa produkshonnan di vários artista grandi manera Michael Jackson, 50cent, Phil Collins i Metropole Orkest a tuma lugá. Einan a graba por ehèmpel kanto, piano, sekshon di ritmo konsistiendo di algun di e mihó músikonan di Hulanda, i un string orchestra ku a partisipá den tur e piesanan. Grabashonnan adishonal pa Muzik sin Barera a tuma lugá na Kòrsou na Source Recording Studio ku kolaborashon di vários músiko/artista manera e urban producer Slick, e perkushonista Pernell Saturnino i e trompetista Igort Rivas.

Pronto lo lansa e promé tema di e proyekto aki, akompañá pa un music video produsí pa e direktor sinemategráfiko Selwyn de Wind. Kòrsou tin di keda pendiente pa mas informashon i por sigui e próksimo pasonan di Dibo i Randal i tambe di ‘Muzik Sin Barera’ riba retnan sosial.