Djadumingu 8 di mei na Avila Beach Hotel

WILLEMSTAD – Despues di dos aña di edishonnan virtual, Dibo D i Randal Corsen ta bèk riba esenario ku otro edishon ‘live’ di “Mama Pa Semper”, é konsierto pa Dia di Mama. Na 2018 e promé edishon di e konsierto aki a tuma lugá na Octagon Plaza di Avila Beach Hotel kargá ku hende. E di dos edishon na 2019 tambe a resultá eksitoso i Dibo i Randal tabata preparando pa e di tres edishon na aña 2020, ora ku e realidat di e pandemia a buta ku mester a wanta un brek. Pa no defroudá e públiko, e siguiente dos añanan Dibo i Randal a organisá edishonnan virtual di Mama Pa Semper. Pero awor ku ta posibel i responsabel atrobe pa organisá evento ku públiko, nan lo ta bèk na Avila Beach Hotel pa presentá nan di 5 edishon di Mama Pa Semper. E show lo tuma lugá riba Dia di Mama mes, djadumingu dia 8 di mei, kumisando 7or di anochi. Karchinan ya ta na benta na Mensing’s Caminada, 24 Uit De Muur i Beep Beep Brievengat.

Sorpresa pa hari

Meskos ku durante e edishonnan anterior, e aña aki lo tin partisipashon di algun invitado spesial: e legendario kantantenan Tony Shearman, Amos Balentin i Dennis Cicilia. E live all-star band ku ta konsistí di 15 di e mihó músikonan di Kòrsou lo kompañá nan. E parti di harimentu no por keda afó. Dibo D ya pa hopi aña ta konosí pa su talento humorístiko i su imitashonnan chistoso. Pues, bo no por sa nunka ken tur lo por blo riba tarima durante e show.

Último añanan e kombinashon remarkabel di e pianista, kompositor i areglista Randal Corsen i e kantante, outor di letra i kompositor Dibo Doran a demostrá di ta hopi produktivo. Aña pasá nan a lansa nan album digital ku ta konsistí di piesanan manera Lanta Bèk, Danki i Willemstad. Pronto nan lo lansa un tema nobo riba merkado i nan ta preparando pa lansa un album kompleto na yüni. Nan lo duna un presentashon di e album aki durante un konsierto ku lo tuma lugá dia 3 di yüli na e festival Dias Latinos na Amersfoort, Hulanda. Randal lo ta ‘Artist in Residence’ di Dias Latinos pa e edishon di e aña aki dunando mas presentashon durante e festival.

Early Bird

E show Mama Pa Semper por konta prinsipalmente ku presentashon di temanan lokal, dediká spesialmente na mamanan di tur edat. Djadumingu 8 di mei porta ta habri 6or di atardi i e konsierto ta kuminsá 7 or en punto. No tin sekshon di VIP ya ku riba e anochi aki tur hende ta VIP. Pero loke si tin ta un kantidat limitá di karchi ‘early bird’ optenibel pa Naf 50,-. Despues di esaki entrada general ta na balor di 60 florin pa persona.