E prome dia druk pa aña 2016 ATA ta premira crecemento den turismo crucero e aña aki

ORANJESTAD, Aruba – 25 di januari 2016: Diaranson awor dia 27 di januari lo bira e prome dia druk den waf di crucero na Oranjestad. Ey lo yega no menos di 5 crucero pareu y lo percura pa yena cayanan di Oranjestad cu pasahero. Manera ta conoci, Aruba Tourism Authority e aña aki ta premira un crecemento di 8.6% di turismo crucero, compara cu 2015. Banda di e industria crucero, A.T.A. ta anticipa un crecemento di 5.5% den cantidad di turistanan di estadia cu lo bishita nos isla den 2016.

Diaranson awor ta sperando bishita di e barconan Princess, Monarch, Azura, Zenith y Celebrity Eclipse. A base di un ocupacion di 98%, lo por spera mas o menos 10,587 pasahero y 4,852 miembro di tripulacion. Dianan asina no ta pasa cu mucho frecuencia, pa cual ta spera cu comercio, operadornan di tour y tur otro partner den turismo ta prepara pa maneha riba 15 mil hende den un solo dia. Mester subraya e hecho cu cruceronan ta bishita varios isla den Caribe y como tal Aruba ta un di nan. Ta importante pa sigui traha duro riba aspectonan di servicio y desaroyo di producto y pa hunto nos duna e turistanan lo miho di nos y alabes sigura cu ambos fluho di turista y di nos localnan por convivi ora cu situacion nan asina presenta.

Mantene presente cu tin mas isla cu hotelnan bunita, cu beachnan blanco, pero locual ta haci nos diferente ta e amabilidad cu nos hendenan ta brinda na cada un di e bishitantenan aki. Laga nos mantene esaki ya mehora tur otro aspecto di e experiencia cu nos bishitantenan tin riba nos isla.