Aruba Mural Proyects manera e nomber mes ta bisa, ta un proyecto di arte publico unda ta crea arte riba murayanan. AMP  ta parti di un esfuerso grandi pa resalta San Nicolas como e centro di nos herencia cultural. Den e siman tras di lomba hopi por a nota cambionan grandi cuminsando for di e inicio di e caya principal pariba cu un edificio completamente transforma y completamente biña, te cu na e rotonde dilanti Nicolaas Store, unda cu e murayanan a haya un capa nobo creando e base pa e artenan.

Bou di e guia artistico di Robert Tromp, cu asistencia di UNOCA y Departamento di Cultura, cu sosten financiero di tanto UNOCA y Aruba Airport Authority, awor ta asina leu cu e hobennan y artistanan local ta cla pa desvela e prome artenan riba muraya. Diahuebs awor lo tin un fiesta riba caya den e area aki unda ta invita comunidad henter unda arte y cultura ta wordo uza pa desaroyo positivo.

Ya caba AMP a demostra di tin un influencia no solamente riba e aspecto di cultura pero tambe den e aspecto social y infrastructural. E poder di arte y cultura ta bira bisto promedio di proyectonan manera AMP. Ta spera cu dor di demostra e potencial di e proyecto e por lanta tambe curiosidad y entusiasmo di nos comunidad pa participa tambe ya cu e ta di comunidad pa nos comunidad. Ta invita un y tur pa no faya e fiesta aki, cu lo ta net prome cu e famoso Carubbian. Diahuebs awor pa 6or y mey di atardi ta spera henter nos comunidad net na e rotonde di Nicolaas Store pa forma parti di e desvelo oficial di e prome artenan di Aruba Mural Proyects.