Cerbes Chill ta spera participacion di mas di 150 boto

ORANJESTAD, Aruba – 11 di Januari 2018: E aña aki diadomingo 14 di Januari lo tuma luga e Boatfest 2018 cu cerbes Chill, unda botonan lo yega hunto y tur hende lo pasa un rato ameno. Algun aña pasa a inicia e Boatfest di cual e aña aki Brouwerij Nacional Balashi ta participa pa di 3 aña na e evento aki. E Boatfest a cuminsa algun aña pasa ora cu e tabata Aruba Boat Trip conhunto cu Varadero. Pa por participa na e evento, lo tin un reunion cu e capitannan di boto pa repasa e puntonan importante.

Den e ultimo añanan Aruba Boat Trip a opta pa organisa e evento aki cu Brouwerij Nacional Balashi, cu cerbes Chill. “Nos lo sigui haci esey den añanan venidero”, asina Mitch Bermudez, representante di mercadeo di Brouwerij Nacional Balashi a expresa. Boatfest ta parecido na “Fuikdag” di Corsou, pero aki na Aruba esaki ta un tiki diferente. Esaki ta pasobra e evento di diadomingo awo lo ta na Surfside Beach, unda cu botonan di Aruba lo mara aki. Tambe lo conta cu participacion di botonan for di Boneiro y Corsou, asina el a expresa.

Durante e Boatfest lo tin un stage cu ta cuminsa riba santo blanco y ta termina den awa, lo bay tin varios actividad y henter dia lo bay tin musica. E evento lo ta desde 12:00pm te 7:00pm, unda cu lo tin DJ y bandanan. E DJnan cu lo ta presente ta Renzo, Top Rankin, Nutz Beatz, DJ di Corsou Menasa, Fab, MC Samil, MC Don T, DJ Yeimy pero tambe lo bay tin banda di reaggae Mystical Connection. A percura cu p’e evento aki lo tin DJnan grandi di Aruba y Corsou, sin laga afo un banda local.

Diabierna 12 di Januari entre 5:00pm y 8:00pm na restaurant Fish House na Varadero lo tin un reunion di capitannan di boto of esunnan cu ta bay riba boto y kier cumpra bebidanan, por cumpra varios producto di Brouwerij Nacional Balashi. Tambe esunnan cu lo disfruta di e Boatfest na beach tambe por pasa na e reunion. Brouwerij Nacional Balashi ta invita tur hende pa bin diadomingo 14 di Januari na Surfside Beach pa asina disfruta di e Boatfest.

Tambe ta corda e landadonan pa mira bon unda ta landa. Ta hopi importante p’e botonan mara nechi banda di otro. “Ora bo ta nabegando, tin hende ta landa y tin hopi boto y pa bo no dal den ningun boto”, asina Mitch Bermudez a splica. Ta enfatisa pa tur hende sigura cu nan ta nabega y landa cu e cautela necesario, teniendo cuenta riba tur aspecto di siguridad.