ORANJESTAD, Aruba – November 2015: Aruba Bank y e scolnan participante na Good4theNeighborhood 2015 ta invita comunidad henter pa presencia e anochi final durante cual lo anuncia e ganador absoluto di e competencia cu ta culmina diabierna awo cu un evento cuminsando for di 6:00pm pa 8:30pm na Paseo Herencia.

A invita e hobennan pa duna contenido na e titulo “Become Savings Star” y nan produccionnan ta berdaderamente impresionante. E trabao di e miembronan di e hurado no tabata facil.

Un total di 9 diferente scol y 54 studiante a participa pa gana tres premio cash fabuloso! Mon Plaisir College, Ibero American High School, Colegio Arubano, Colegio San Nicolas, Colegio San Antonio, Middag MAVO San Nicolas, Maria College MAVO, International School of Aruba y Scol Practico pa Ofishi Santa Cruz a tuma e reto pa crea un a”awareness” video cu ta refleha e importancia di “Savings”.

Diabierna, 20 di november 2015, Aruba Bank lo anuncia e scolnan cu a gana e tres premionan, esta 10.000 florin, 7.500 florin y 5.000 florin cu e scolnan ganador por inverti den proyectonan pa nan scol.

Aruba Bank ta invita un y tur pa bin disfruta di un momento ameno y emocionante na Paseo Herencia y celebra y apoya e produccionnan, creatividad y trabao di nivel halto cu e hobennan aki a presenta.