WILLEMSTAD — Tur aña di nobo, dia 14 di yüni paisnan rònt mundu ta selebrá Dia Mundial di Dunamentu di Sanger. E aña aki ta yama danki na tur e boluntarionan ku sin pago pa nan gesto di duna sanger pa salba bida i na e mesun momento konsientisá e nesesidat ku ta eksistí pa duna sanger ku lo mester garantisá e kalidat, seguridat i disponibilidat di e produkto sanger pa e pashèntnan ku ta den nesesidat.

Transfushon di sanger i produktonan di sanger ta yuda salba miónes di bida tur aña. E por yuda pashèntnan ku ta sufriendo di kondishonnan ku lo a kosta nan bida, pa hiba un bida mas largu ku un kalidat di bida mas haltu i ta sostené proseduranan di siruhianan kompleho medisinal. Tambe e tin ròl esensial den skapa bida di e mucha den kuido maternal i tambe durante desaster krea pa hende o natural.

Sinembargo, den vários pais tin mas demanda ku tin e produkto di sanger disponibel, loke ta trese kuné ku e reto pa tin sufisiente sanger na disposishon mas grandi, miéntras ku mester tene kuenta ku e kalidat i seguridat. Un kantidat di sanger na disposishon por keda sigurá dor di donantenan ku ta duna sanger ku regularidat, dor di dunadónan di sanger ku ta voluntario. E meta di WHO ta pa na 2020 kada pais ta produsí sufisiente sanger di nan mes hendenan.

Awendia, ta den apénas 62 pais e kantidat di sanger ku ta keda produsí pa nan propio hendenan ta yega 100% di dunadónan di sanger ku ta hasi esaki voluntario, miéntras ku den 40 pais ainda esaki ta dependé di famia o te hasta di hendenan ku mester wòrdu pagá pa nan duna sanger.

Dia 14 di yüni ta Dia Mundial di Dunamentu di Sanger. E fecha ku ta selebrá esaki ta 14 di yüni. E tema ku lo keda usa e aña aki ta: Danki B’a salba mi bida”

E focus di e aña aki ta pa gradesí esnan ku ta dunadó di sanger ku ta salbando bida tur dia, dor di ta un donante di sanger i di e forma aki enkurashá mas hende rònt mundu pa bira un dunadó boluntario di sanger i asina ei usa e slogan: Duna libremente, duna konstantemente. Donashon di sanger ta konta”.

Nos aki na Korosu tambe lo para ketu riba dunamentu di sanger. E 5 ophetivonan ku lo para ketu riba dje ta:

 

• Gradisí e dunadónan di sanger pa nan donashon ku ta salba otro su bida;
• Promové donashon di sanger boluntario;
• Krea kampañanan informativo pa konsientisá e komunidat di e importansia i nesesidat pa duna sanger, riba un base regular. Esaki pa motibu ku e komponentenan di sanger tin un durashon di “bida” kòrtiku;
• Pone atenshon na salú di e dunadónan di sanger;
• Pa Ministerionan di Salubridat mustra nan apresio pa dunadónan di sanger ku ta hasi esaki riba un base regular.

 

Aktividatnan siman 8 – 14 di yüni próksimo:

 

• Simposio ku e siguiente protagonistanan:

• Ministerio di Salubridat , Medioambiente i Naturalesa;
• Dunadó di sanger:
• Banko di Sanger;
• Dietista;
• Risibidó di sanger ku su bida a wòrdu salba

 

E aktividat aki ta habri e siman di konsientisashon riba Dunamentu di Sanger.

 

Den e siman ei lo tin un Promo Team i GMN ku lo reparti T-shirt na diferente Ministerio i di 4 or pa 5 or lo tin Zumba. Meta di esaki ta pa konsientisa i mustra empleadonan publiko e balor pa nan tambe bira donante di sanger.

 

Djadumingu dia 14 di yuni ku ta e dia mes ku ta selebra dia mundial di dunamentu di sanger, lo tin un dia habri na Banko di Sanger na Otrabanda, kaminda lo tin Zumba gratis pa tur esnan presente, pero na e me sun momentu lo tin aktividatnan di repartimentu di informashon i opsekionan.