Willemstad – Despues di un eksitoso promé dia di training, JCI IOBA Curaçao i Banco di Caribe ta organisá un di dos dia di training kompletamente grátis den kuadro di e proyekto Creative Young Entrepreneur Award (CYEA). E dia di training aki lo tuma lugá dia 16 di mei próksimo den oula di University of Curaçao for di 9 or di mainta te 5 or di atardi.

JCI IOBA Curaçao ta un organisashon lokal ku ta afiliá na Junior Chamber International (JCI). JCI ta e federashon mundial di lidernan entre 18 pa 40 aña ku ta dediká na trese kambio positivo den nos komunidat.

Pa di shete aña konsekutivo JCI IOBA Curaçao huntu ku Banco di Caribe ta organisá “The Creative Young Entrepreneur Award” (CYEA). CYEA ta rekonosé, honra i selebrá empresarionan eksepshonal, i e ròl di kreatividat den nan éksito. E tema di CYEA e aña aki ta ‘’Crafting your Business’’. E programa lo yuda empresarionan hóben i tambe hóbennan en general ku ta aspirá pa bira empresario identifiká i uza elementonan esensial pa por tin un negoshi ku ekselensha duradero. Komo parti di e proyekto lo tin un dia di training ku lo tuma lugá djasabra 16 di mei próksimo. E training lo tin komo meta prinsipal pa ofresé hóbennan empresario e instrumentonan nesesario pa por sigui krese. Esaki lo bira un chèns úniko pa haña konosementu práktiko i sigur balioso pa yega na un empresa duradero.  Inskribí lihé paso lugánan ta limitá!

Interesadonan tambe lo tin e oportunidat pa haña mas informashon tokante e proyekto su rekisitonan pa asina hasié mas aksesibel pa nan por inskribí komo partisipante. Banco di Caribe ta pone su mes pa di 7 biaha atrobe komo patrosinadó prinsipal ku un premio di NAF 10.000 pa e ganadó di CYEA ku ta keda organisá pa JCI IOBA Curaçao. E aña aki lo introdusí un kategoria nobo special pa e hóbennan ku ta aspirá pa bira empresario, “the Aspring Young Entrepreneur Award” (ACYEA).

Pa inskripshon y mas informashon tokante CYEA 2015 bishitá www.iobacyea.com òf e página di facebook di JCI IOBA Curaçao.