…nos tim nashonal di futbòl lo no por ta presente pero e fiesta ta sigui!…

WILLEMSTAD:- Den transkurso di djabièrnè Renaissance Curaçao Resort a wòrdu informá ku lamentablemente e selekshon di Kòrsou lo no por tei presente na e aktividat “Cubaçao Fiesta” ku a keda skematisá riba djasabra dia 6 di yüni. “Nos ta lamentá masha hopi, komo ku previo tur promoshon nos a risibí konfirmashon ku nan lo tei; sinembargo nos ta komprondé kompletamente nan rasonnan pa kanselá nan presensia i ta deseá nos selekshon nashonal hopi éksito”, esaki di akuerdo ku Sra. Maritza Molina, Sales and Marketing Director di Renaissance Curaçao Resort. Pero fiesta den Renaissance Rif Fort ta sigui normal awe djasabra 6 di yüni!

Rumbo pa mundial; nos tim nashonal meresé tur atenshon i sosten. Ta huntu nos ta 12! Pa motibu di esaki Renaissance Rif Fort ta añadí un tiki sabor di Cuba p’asina hinka tur hende den ambiente di futbòl. Riba djasabra dia 6 di yüni próksimo konsiderá Renaissance Rif Fort ekivalente na e barionan mas popular di Cuba; sintibo na Malecon, Vedado, Havana òf Santiago de Cuba. Lo transformá Rif Fort den un bario cubano pa presentá “Cubaçao Fiesta”. For di 8’or di anochi te 1’or di mardugá lo tin ‘rumba’ cubano yen di son montuno, salsa, abakuá- kuminda i bebida típiko. Igort Rivas di Tumbao Cubaçao i Gino Coelho & Co lo pèrkurá pa un anochi tropikal. Pa hinka tur hende den ambiente lo bai tin baliadónan di salsa ku lo entretené públiko ku un show tur afó.

Burger Bar, Royal Dutch Cheesery i Douwe Egberts lo ta será pa servisio di sena pero huntu nan lo operá stèntnan di kuminda i bebida durante di e anochi aki. Ta bon pa menshoná ku por kumpra kos di kome i di bebe ku ‘tokens’ ku lo ta optenibel na e ‘token stent’ den Rif Fort mes. “Nos ta deseá di duna tur hende un eksperensia ‘a la’ Havana durante di e “Cubaçao Fiesta”. Públiko no mester paga nada; pues e invitashon ta pa tur hende bishitá “Cubaçao Fiesta” i disfrutá”, esaki di akuerdo ku sra. Karen Felida di Renaissance Resort & Rif Fort. Tur esnan ku ta deseá di bishitá Ema-Tei, Steak & Ribs i Anchor por hasi esaki normal durante e anochi aki. Entrada pa “Cubaçao Fiesta” ta grátis; motibu sufisiente pa bini ku un grupo grandi i disfrutá di un tremendo anochi!