Fundashon Pro Bista ta un instansia parsialmente supsidiá ku e meta pa integrá personanan ku bista hopi limitá i esnan sin bista den nos komunidat i krea asina mihó kondishonnan di bida pa e grupo aki.

Fundashon Pro Bista ta selebrando nan di 20 aniversario i ta organisá diferente aktividat henter aña, p’asina yega na fondo pa realisá diferente proyekto pa nan klientenan.

Den e 20 añanan ku a pasa nan a logra diferente meta, por ehèmpel, Lès di músika, Porta elektróniko, Kura di rekreo, Guia pa muchanan na skol i hopi mas.

Manera ya boso konosé e fundashon aki, nan kier ofresé nan klientenan e kuido ku nan meresé pues ta keda empeñá den forma ‘ out of the box’ pa  konsientisá i stimulá pueblo pa konosé nan i alabes siña ku hendenan ku limitashon visual ta forma parti di nos komunidat.

Dia 19 di sèptèmber na Corriweg 16 pa 7 or en punto, Nostra Casa del Buongusto, Confetti & Co, Casa Valduga i Fundashon Pro Bista, a sera kabes huntu pa organisá un aktividat bastante impaktante.

Señora Michelle Baldwin di Nostra Casa del Buongusto, ta un eksperto di biña i a skohe 5 diferente biña di Casa Valduga ku ta un kas di biña spesialisá riba biña desendiente di Brasil. Huntu ku mener Chehadi Edinne di Confetti & Co a distinguí e sabornan di e biñanan i a diseñá diferente ‘pasapalu’ kulinario ku su toke Brasileño.

Pues e aktividat aki ta bai ta algu fo’i dje mundu aki. P’esei Fundashon Pro Bista ta invitá pueblo na su Wine tasting and Food Pairing in the dark ku ta algu nunka ‘ bisto’ na Kòrsou!

Pues mèldu via nan mail: info@probista.com, facebook: www.facebook.com òf telefòn: 7379222 pa bo eksperensia algu ku tiki hende riba mundu tabatin kurashi di organisá!

Lugánan ta limitá!