Junior Tecla ku su fundashon Turtuga, ta tresiendo kambio den bario ku konstrukshon di un Wifi’ng Park. Turtuga Entertainment & Art Stichting (Stichting Turtuga) a wordu funda dor di e musiko, kompositor i artista Junior Tecla. Meta di e fundashon ta pa stimula konsientisashon kultural, ku enfasis riba nos hobenan i dor di promove balornan manera respekt, konosementu propio, union i dor di empodera nos hendenan. Stichting Turtuga ke trese e High Flying Parks bek ku un ‘twist’ inovativo i un toke edukativo. Un di e karateristika ta e uso di Wi-Fi i organisa aktividatnan ku koperashon di miembronan di bario. “Tabata difisil skohe un bario dor ku tur bario tin nesesidat di un Wifi’ng park. Despues ku nos a hasi un eskoho, nos a bai den e bario, organisa nochi di informashon pa nos konose e habitantenan di e bario i nan nesesidat. Prome ku nos a kuminsa, a tuma luga un limpiesa ekstenso kual tabata urgente”, Junior Tecla ta konta. Hopi hoben no por bai aktividatnan pafo di nan bario. Stichting Turtuga ke solushona esaki dor di trese aktividatnan kreativo i artistiko den e bario. Tambe nan ke stimula trabou pa e habitantenan di e bario. E lokashon di e parke ta banda di Oranjeschool den Oranjestraat! Parti di e parke ta un theatro den aire liber ku Junior Tecla, su fundashon Turtuga a traha huntu ku e habitantenan di Monteverde, Coronet, Nieuw Nederland i Parera. E parke ta ofrese Wi-Fi gratis pa tur hende por hasi uso di dje. Dia 11 di Oktober lo ta e gran dia: lo inougura e parke i e tambe lo tin e konsierto di Junior su release di su single nobo “Ban Pone Lus” en koleborashon ku Elia Isenia & Area 51. Fondonan rekouda dor di e benta di e single lo wordu uza pa pone lus nan veldnan di deporte. Tambe lo tin presentashon di Isocco i Ana Iria Nivillac. Tur esaki nan di 8.00- 11.00 PM, entrada ta gratis i tur hende ta keda kordialmente invita pa bin selebra. Stichting Turtuga ke gradisi Stichting DOEN pa nan sosten i donashon pa por hasi e projekto aki bira un realidat.