Randal Corsen ku konhunto di 16 músiko

WILLEMSTAD – Djasabra dia 1 di yüli suela lo tembla na Brakkeput Mei Mei ora e pianista i lider di banda Randal Corsen ku su orkesta dirigí un fiesta di baile i músika basá riba ‘salsa brava’, e forma mas rudimentario di salsa. Esei ya ta ilustrá ku e wéspetnan por antisipá e músika di e banda di 16 persona, pero nan por bai dilanti tambe pa marka paso di salsa riba dansflur.

Benta di karchi na rason di 50 florin pa persona ta tuma lugá na Mensing’s Caminada, Van den Tweel Zeelandia i Jan Thiel, miéntras si sobra lo bende na porta tambe e anochi mes. Amantenan di salsa por bin gosa un bòl e anochi nèt prome ku e dia liber en konekshon ku Dia di Banda i Himno. Tiki hende sa ku Randal Corsen su kurason ta bati duru pa salsa, loke por lo demas esei ta konta tambe pa diferente di e músikonan ku ta kompañ’é. Su preferensia ta pa e salsa mas puro for di New York. Algun terminologia ku nan ta usa p’e ta ‘salsa brava’, ‘salsa dura’ i ‘salsa gorda’, i esei ta forma un kontraste por ehèmpel ku ‘salsa romántica’. Presentando salsa Randal Corsen ta kumpliendo alabes ku un deseo di hopi, esta di por balia tambe riba e músika i no solamente sinta ketu bon mucha skuchando.

Pa kuadra bon den e konteksto aki Lanthùis Brakapoti Mei Mei lo pèrkurá pa un berdadero bar di mojito pa evitá ku e gargantanan por seka, aparte di tur e otro kosnan pa tira na boka na un okashon asina.

Gran influensia

Randal Corsen: “Hende konosé mi prinsipalmente di jazz. Tòg mi ta konsiderá mi mes tambe salsero. Mi ke agregá mesora ku loke den esaki a hasi un influensia hopi grandi riba mi ta dia mi a sera konosí ku e obranan di Eddie Palmieri. Mi ta atmir’é masha hopi mes, komo pianista i komo areglista”.

E anochi ei nan lo interpretá ademas piesanan di grandinan di salsa, manera di Ruben Blades, Celia Cruz, Hector Lavoe i Ray Barreto. Konstelashon di e orkesta ta kasi igual na e Big Band na Awasá i esun di Paranda di Fin di Aña di desèmber último kaminda e públiko a keda pidi mas, ke men ku e kantantenan Dibo Doran, Yumarya Grijt i Rich Pieter. Dia promé di yüli awor nan ta haña respaldo Corsen su kompañantenan fiho manera Eric Calmes riba baho i Pernell Saturnino riba perkushon, i klaro ku e mes tras di piano. Ademas lo tin un sekshon ku 6 supladó, bou di guia di e konosido trompetista Igort Rivas, i e otronan den e sekshon rítmiko ta Marlon Conradus riba drùms, Ernie Gregorius riba timbales, Eric Brigitha riba bongo i kampana, i Royston Hato riba perkushon i pa backing vocals.