WILLEMSTAD – Ku orguyo Avila Beach Hotel ta anunsiá ku un biaha mas nan a risibí e sertifikashon di Travelife Gold pa durabilidat den e industria di turismo. Travelife ta un label internashonal ku ta promové durabilidat den e sektor di turismo. Un sertifikashon di Travelife Gold ta enserá ku akomodashonnan lo mehorá e impakto riba medio ambiente i lo sostené semehante manehó sosial. Avila Beach Hotel a risibí e Travelife Gold Award pa di promé biaha na aña 2013, resientemente a ekstendé e sertifikashon aki. E hotèl mester a kumpli ku un lista di inspekshon ku ta konsistí di 163 elemento ku e hotèl mester a mantené su mes na dje. Pa e echo aki Avila Beach Hotel ta masha orguyoso ku e rekonosementu aki.

Reglanan mas severo
E eksigensianan pa durabilidat di Travelife ta bira kada bes mas severo. Kada dos aña un ouditoria nobo ta tuma lugá kaminda puntonan di mehorashon ta bini dilanti ku den seis luna mester keda implementá pa por optené e Gold label. E hotèl mas bieu operashonal na Kòrsou a risibí e sertifikashon pa motibu ku nan ta hiba un bon manehó sosial (por ehèmpel dor di tuma mas tantu personal lokal na trabou i kumpra mas tantu produkto lokal), sòru bon pa e bisindario i komunidat (por ehèmpel dor di opsekiá mobilario i otro artíkulonan pa un bon kousa i e personal ta duna tur luna un kontribushon chikí ku e maneho di Hotel ta dòbel i opsekiá esaki na Oranjeschool ku ta keda den serkania). Mas ku klaro ku Avila Beach Hotel ta dediká su mes na kuida e medio ambiente na Kòrsou tambe. Ehèmpel di esaki ta organisashon di diferente Clean Ups, pone lusnan LED pa redusí usó di energia, redusí gastamentu di awa i plèstik, resiklahe di bleki di aluminio i plèstik (PET 1) i separá restu di kuminda den kushina pa un kunuku lokal ku tin krio di porko.

Durabilidat ta marka pouta
Kada bes mas tantu kompania Europeo i partikularnan ta tene kuenta ku durabilidat ora nan ta hasi nan eskoho pa akomodashon di hotèl. Un kantidat di operador turístiko, por ehèmpel TUI di Hulanda, ta presta atenshon partikular na destinashonnan ku un sertifikashon di durabilidat. Huéspetnan ku ta bishitá Avila Beach Hotel tambe por yuda na mehorá Kòrsou dor di partisipá na e proyekto di ‘Pack for a Purpose”, kaminda nan por trese artíkulonan di skol pa Oranjeschool ku ta keda den bisindario di e hotèl. Debí ku e proyekto a resultá un éksito grandioso a añadí Schotborghschool den Koraal Specht for di aprel na e proyekto aki.

Plannan pa futuro: Kultura riba bo tayó
Dor di promové kushina regional mas tantu den restorantnan i presentá menúnan mas saludabel, Avila Beach Hotel, ta stimulá kunukeronan lokal pa kultivá berdura i fruta di un manera mas duradero. Kuminda regional (o sea From Farm to Fork) i kontinuashon den durabilidat denter di e kadena di kuminda ta gana popularidat mundialmente serka turistanan internashonal i huéspetnan lokal. Konsumidónan ke sa for di unda nan kuminda ta bini i tin preferensia pa e ta lokal. Low Food Miles ta aportá na menos dispidimentu di kuminda i un mihó medio ambiente.

Pa mas informashon tokante di durabilidat na Avila Beach Hotel por wak riba: http://www.avilabeachhotel.com/about-avila/green-travel