WILLEMSTAD – Djaweps 24 di ougùstùs 2017 JCI United Citizens of Curaçao (JCI UC) lo kuminsá ku su di tres edishon di e proyekto, “Manera mi BOS, no tin DOS”. Den e proyekto aki e hóben lo wòrdu ekipá ku konosementu kon pa hiba un diskurso, kon pa ekspresá su mes, formulá i defendé su opinion a base di bon argumentashon i echonan.

JCI su meta prinsipal ta pa trese kambio positivo den komunidat pa medio di diferente proyekto i evento ku ta aportá na komunidat di Kòrsou den un forma positivo i duradero.

Pa sigui aportá na e desaroyo efektivo i duradero di nos hóbennan JCI UC ta kontentu di por kontinuá ku e di tres edishon di e proyekto: “Manera mi BOS, no tin DOS”.

E aña aki JCI UC tin e oportunidat di traha un biaha mas ku Division A Toastmasters Curaçao, Fundashon Kalidat Profeshonal Edukashon Kòrsou (KPEK), Youth Vision 5000 i tambe Biblioteka Nashonal di Kòrsou.

E proyekto aki ta partí den dos fase. E promé fase ta e parti preparatorio i e di dos fase ta e kompetensia di debate. E fase preparatorio lo dura di sèptèmber pa novèmber. Durante e periodo aki e hóben ta partisipá na diferente training, entre otro kurso ku ta trata “Kontenido di e 17 metanan duradero di Nashonnan Uní”, kurso básiko di papiamentu ‘’, “presentashon dilanti un públiko” i tambe “abilidat pa debatí”. Den e di dos fase, esta e kompetensia di debate, e hóben ta haña e oportunidat pa pone tur loke ku el a siña, den práktika. E kompetensia ta tuma lugá den luna di novèmber. E parti di debate lo stimulá e hóben pa pensa krítiko, komuniká efektivo i tambe traha efisiente i produktivo den tim.

“Manera mi BOS, no tin DOS”, ta ekipá nos hóbennan ku e abilidat nesesario pa por prestá mihó na skol, den nan futuro karera i alabes kontribuí na nan formashon pa asina nan por ta kapasitá pa por fungi komo lidernan den nos komunidat i tambe kumpli ku nan responsabilidat komo siudadano aktivo den un sosiedat demokrátiko.

Ainda a sobra algun lugá, si bo ta un hóben entre 16-23 aña, no pèrdè e oportunidat aki i registrá pa bo tambe partisipá na e proyekto aki. Partisipashon ta grátis.

Pa mas informashon por bishitá nos página di Facebook “Manera mi BOS, no tin DOS” òf manda nos un e-mail na: maneramibonotindos@gmail.com.