Mas ku 210 aktividat i 5000 boluntario

WILLEMSTAD— E wikent di CURA DOET tabata ekstraordinario un biaha mas.
Mas ku 5000 boluntario a duna orea na e yamada pa dun’un man na organisashonan rònt Kòrsou. Mayoria tarea i aktividat, mas o menos 160, a tuma lugá riba djasabra. En total tabatin 196 organisashon ku a partisipá.  E wikènt a inspirá hopi hende i a resultá den yen Kurason sumamente satisfecho. Grandi ta e gratitut di tur e organisashonan ku a haña un yudansa imenso.

E promé tareanan a ranka sali djabièrne mainta fo’i 7 di mainta i gran parti di e trabou a kulminá djasabra atardi banda di 6 or di atardi. Mas ku 30 skol a partisipá pa por a duna nan skol un kara nobo i e resultadonan sigur lo sorprende muchanan ora nan yega djaluna. Alabes hóbenan a forma e grupo di boluntario mas grandi. Albert schweitzer College HAVO/VWO a partisipá ku tur su 300 studiantenan, Radulphus College ku mas o menos 180 hóben i skolnan manera Amador Nita, SGO Jacques Ferrandi, Maris Stella, VSBO St. Jozef i Universidat di Kòrsou tambe a sa di mobilisá basta hòben. Hóbenan di Scouting tambe a yuda nan mes gruponan pero tambe a dun’un man na otro organisashonan. Kompanianan tambe a partisipá masal i a sa di kontribui ku rekurso humano i finansiero na diferente kaminda.

Manera tu aña nos gobernador Lucille George-Wout tambe a forma parti i e aña aki ie biaha aki ela hasi un paseo ku grandinan uní di Banda Ariba. Diferente grupo di grandi a partisipá pa promé biaha i a organisá dia di salú, ‘high tea’, atardi musikal na diferente hòfi òf sentro di bario ku entretenimentu di diferente artista.

E organisashon di CURA DOET, den man di Curaçao Cares i Oranjefonds ku sosten di Reda Sosial, ta sumamente kontentu ku tur e resultadonan i ku tantu boluntario i organisashonan por a haña chèns di traha huntu. Segun Janis Vinck, lider di proyekto; “E aña aki nos a graba diferente video ku nos lo sigui estrená riba nos página di FB den simanan benidero. E reakshonan ta indiká ku atrobe CURA DOET tabata dos dia ekstraordinario pa personanan di tur edat i ku tur hende ku partisipá ta gosa di e eksperensha di por duna bèk i nifika algu pa nan komunidat. I e sintimentu ei ta presisamente lokual nos di Curaçao Cares kier kultivá.”

Lamentablemente tabatin algun organisashon ku no a haña boluntarionan nobo òf a plania pa mas hende i al final menos hende a bini. Den algun kaso materialnan tambe no a yega tur kaminda I sierto trabounan no a keda kla. Huntu lo bai wak kon pa sigui traha riba e parti di komunikashon i preparashon. Pero gran mayoria a kana sublime. Nos kier yama pueblo di Kòrsou kompletu pabien ku e dos dianan positivo aki kaminda nos a hasi di Kurason i logra hopi huntu”. Pabien Kòrsou!