WILLEMSTAD – Despues di a produsí “Subway Silence” (2008) i “While I’m awake” (2010) i kolaborá ku hopi artista internashonal, aktuando rònt mundu, dia 20 di sèptèmber último e artista yu di Kòrsou ku a profilá den Curaçao North Sea Jazz i tambe Caribbean North Sea Jazz na hermana isla Aruba, Giovanca a saka su álbum nobo ‘Satellite Love’. E di tres álbum akí ta un tapiseria di emoshon i eksperiensha bòrdá di zonido ku ta reflehá un biahe di sintimentu kaluroso ku ta buska su kaminda den bida, tempu i ritmo. “Satellite love” ta  testimonio di Giovanca su evolushon personal i artístiko tantu komo un re-deskubrimentu di su raisnan musikal. I esaki ta resoná den un músika dinámiko i instintivo. E ta emoshonante, meskos ku bida mes. Riku na goso, pero tambe ku un tinto melankóliko. Giovanca: ” Loke mi kier a hasi ta integrá e influensha di e músika ku m’a lanta kuné, e tempu ku mi a lanta aden i mi bida nobo di awendia, enfrentando asuntunan di presente. I tabata importante pa mi, pa haña almanan ruman ku huntu ku mi por a komprometé ku e proseso akí”. P’esei no tabata difísil pa disidí di ko-produsí e álbum akí ku e ‘Nelson & Djosa’ (NL). Nos ta amigu hopi tempu kaba, a yega di toka huntu den mesun banda, i ta kompartí  pashon pa músika soul/jazz di añanan 70 i kuminsamentu di 80.  Giovanca: “Na momentu ku bo mira ku boso tin kasi eksaktamente e mesun kolekshon di LP bieu bo sa mesora ku boso ta alma ohochi”. Flouta, harpa, vibe, metal, perkushon, glockenspiel, synths antiguo. Nos tabata sa kla kon e zonido mester ta. Mi tabata ke un vibrashon kósmiko i sigur un tiki di Kòrsou aden. Un chapi, un barí. I nos a bati kabes huntu pa haña e músikonan kapas pa krea e magia ku nos kera mira, kuminsando ku selekshon di e banda básiko di músiko maravioso, kada unu di nan ku afinidat i pashon fuerte pa e antepasadonan musikal ku nos tin huntu”. Grabashon di e album tabata manera un proyekto di famia. I e ta mashá orguyoso ku riba e album tin zonido di instrumentonan di Tera Percussions, trahá na man na Kòrsou, kaminda Giovanca tin su rais. E produkshon konhunto di Nelson & Djosa kombiná ku e bos típiko suave i liviano di Giovanca a resultá den un album ríkamente nivelá ku ta pone hende sinti nan bon i ta duna e skuchadó gana di tantu relahá i reflekshoná, komo lanta baila.

Keys: Brandon Coleman -LA- (Thundercat, Rachelle Ferrel)

Bass: Alex Bonfanti -UK- (Amy Winehouse, Tom Jones)

Drùm: Nathan Allen -UK- (Amy Winehouse, Faith Evans)

Perkushon: Grammy award winning Pernell Saturnino -CU (Dee Dee Bridgewater, Chick Corea)

Guitara: Rory Ronde -NL (Benny Sings, Wouter Hamel)

Label: DoxRecords

E gran produkshon aki ta rumbo pa Pais Kòrsou, pues keda pendiente pasombra esaki bo no por falta den bo kolekshon.