WILLEMSTAD – Fundashon Bon Intenshon, inisiadó i enkargá ku organisashon di Festival di Pueblo dia 2 di yüli den Otrobanda, ta sumamente orguyoso di e manera ku Kòrsou a gara e selebrashon di e dia aki. E entusiasmo pa e dia ta grandi i nos ta kla pa e di dos edishon.

E programashon di e dia aki ta hopi varia i meskos ku aña pasá nos ta spera di duna e dia akí un dimenshon kultural nobo.  Kla p’asina kada ken na su manera por demostrá su amor, solaridat i koperashon pa edifiká na un Kòrsou duradero.

Manera aña pasá nos lo sera kaya for di Neto Bar te Plaza Brion i a lo largo di e ruta aki nos lo ofresé músika di Kòrsou, nos baile, teater, nos kushina krioyo, nos arte i nos kosnan di boka dushi aki.

Pa 7or lo klousurá ku e banda Gents na Plaza Brion ku lo duna un homenahe na kompositornan i músikonan Kurasoleño di antes.

Loke nos ta pidi un i tur ta: ban kolaborá ku otro i ser modelo di e suidadano ehemplar. Ban disfrutá huntu di un Dia di Bandera inolvidabel. I ku bo koperashon nos di 2 edishon di bo Festival di Pueblo lo bira un dia festivo.