Djadumingu próskimo dia 28 di aprel

Despues ku aña pasá e tabata un éksito rotundo, Keep it 100 and Shine, organisashon presidí pa nos Miss Universe Curaçao Akisha Albert, ta organisá e di dos edishon di “Down Right, Down Perfect Fashion Show”.

Mas i mas ta e atenshon ku nos hendenan ku down syndrome a bin ta haña últimamente. Ehèmpel di esei ta e eksitoso dia di Happy Socks, dia ku a yuda mas na e konsientisashon di nos hendenan tokante di down syndrome.

Pa di dos aña konsekutivo Keep it 100 and Shine ta organisá e show di moda “Down Right, Down Perfect Fashion Show”, ku e meta pa pone mas lus riba nos hendenan ku down syndrome. E aña aki un total di 35 modelo lo ta riba pasarela kompañá ku un selebridat. Kasnan di moda partisipante ta Gazini Sun Moon, Cocoon i Mini Me.

“Down Right Down Perfect Fashion Show” ta tuma lugá djadumingu awor dia 28 di aprel na Renaissance hotel di 5or pa 8or di anochi. Karchinan ta kosta solamente 35 florin i ta optenibel na Pasarella Beauty na Sta. Rosa, Maison Zuly na dr. Maalweg i tambe Mini Me na Sambil.    

Tur entrada ku generá, lo bai bèk pa nos muchanan ku down syndrome!