WILLEMSTAD – Hotèl Avila ku orguyo ta anunsiá ku Robert Martis (Manager on Duty) di Hotèl Avila a haña un beka pa sigui un kurso di verano. E lo asistí na dos kurso dirigí riba hospitalidat na e Universidat renombrá, Cornell University, distinguí den e top 20 di mihó universidatnan na mundu. Farley Hollander tabata e promé delegado di Hotèl Avila ku a hasi e biahe aki pa New York. Awe, 15 aña despues, Robert Martis lo ta e di dies empleado ku lo atkirí e eksperiensia úniko aki.

Solamente empleadonan altamente motivá ku hopi talento ta wòrdu ofresé un oportunidat eksepshonal asina aki. Robert Martis konstantemente ta haña elogio serka huéspetnan, pero tambe di koleganan i aña pasá e la ser nombrá Empleado di Aña. Hotèl Avila ta un di e poko hotèlnan na Kòrsou ku dor di ofresé kursonan den eksterior partíkularmente na Hulanda i Estadonan Uní di Amérika, ta sorú pa formashon i desaroyo di nan empleadonan. Tambe Hotèl Avila ta organisá regularmente periodo di práktika i entrenamentú, spesialmente na Sürnam i Hulanda, pa su empleadonan. Hotèl Avila, en partikular, gerensia i tur e delegadonan ku a presed’é ta deseá Robert Martis hopi éksito i un estadia plasentero na New York.