Y hopi ta kontentu ku e echo aki. Dia 29 di òktober FRED Expo ta bolbe tuma lugá na Rotterdam despues di un ousensia di 3 aña pa motibunan ku nos tur konosé, e pandemia. Awor ku por atrobe, e meeting point físiko den forma di un job fair por tuma lugá manera ku ta kustumbrá.

Ku patrosinadó prinsipal Maduro & Curiel’s Bank (MCB) Group, e organisadónan ta primintí di trese dilanti un programa yena ku no solamente vários organisashon partisipando ku nan booth, pero tambe un programa ku diferente ora dor, panelistanan, workshops y presentashon pa studiantenan y profeshonal nan na Hulanda.

Mas ku 30 kompania y organisashon di e islanan Karibe Hulandes, for di sektornan finansiero, hotelero, médiko, IT, hurídiko, y logístiko ta hasiendo e biahe pa Hulanda pa recruit talentonan pa añadí na nan ekipo local. MCB Group lo ta presente ku representante di Caribbean Mercantile Bank, Maduro & Curiel’s Bank y Windward Islands Bank.

“E meta prinsipal ta keda mesun kos ku semper,” co-organisado Tristan Every ta menshoná, “pa sigui krea un lugá físiko kaminda dunadó di trabou di e islanan por topa y konosé buskadónan di trabou na Hulanda y asina sigui kombatí e brain drain ku e islanan konosé pa añanan largu.”

Co-organisado Quincy Sintiago ta añadi: “Human interaction ta un yabi klave pa atrae talentonan. E echo ku por duna otro un man, mira otro den wowo y sinti otro su vibra, den mayoria kaso ta e faktornan determinante pa konvensé otro ku ta un match.”

FRED Expo ta tuma lugá dia 29 di òktober na WTC Rotterdam i ta kompletamente grátis pa públiko. Pa mas informashon por bishitáwww.fredexpo.com of por tuma kontakto ku e organisadónan via fred@cr38te.com.