TDS for di 1988 a kuminsá suministrá e isla ruman di Boneiru ku señal nan digital di televishon paga.

TDS ta usa aktualmente e frekuensianan di MMDS pa asina brinda e servisio di televishon digital. Internashonalmente e frekuensianan aki a wòrdu asigná na otro propósitonan denter di telekomunikashon ku e konsekuensa ku TDS no por keda brinda servisio di televishion digital den e frekuensianan MMDS.

Esaki a kousa ku TDS den fin di siman pasa a informá tur kliente na Boneiru ku dia 31 di mart próksimo, lo ta e ultimo dia ku e zendernan na Boneiru lo transmití señal di TDS pa tur su klientenan. TDS no kier a simplemente bai sin gradisí tur su klientenan ku a karg’e den e 12 ½ añanan ku a pasa.

Den e karta ku TDS a manda pa su miembronan e la informá tur kliente ku komo gesto pa tur e añanan aki lo e regla TUR kliente e luna di Mart kompletamente grátis. Ademas dia 18 di mart próksimo un team di TDS lo tei presente na Boneiru pa personalmente gradisí tur miembro ku loyalmente a sostené e kompania riba e isla di flamingo.

Komo otro gesto TDS a drenta un areglo ku Flamingo Cable, pa duna tur e klientenan di TDS un pakete spesial ku ta super atraktivo pa nan por keda ku servisio di TV paga na bon preis i ku un bon variedat manera TDS semper a brinda. TDS a entrega un lista di tur e klientenan aki na Flamingo Cable i simplemente e klientenan aki mester akudí na e ofisina di Flamingo Cable i informá ku nan ta kliente di TDS i ku nan kier tuma e servisio di Flamingo Cable.

TDS ta lamentá ku e no por sigui ku su produkto na Boneiru pero sa ku Flamingo Cable lo duna e klientenan aki e produkto ku nan meresé.

Tur kliente di TDS lo risibí den e próksimo dianan aki un invitashon pa e seremonia di despedida riba 18 di mart 2017. Tur kliente mester bini ku e invitashon pa por drenta na e evento aki. Un biaha mas TDS kier a gradisí tur kliente pa e 12 ½ añanan ku pueblo Boneriano a sostené e kompania di TV paga aki. Boneiru boso semper lo keda parti di Esun Di Nos i boso lo keda ku TDS 4 life den boso kurason.