Digicel y AHATA a combersa tocante ‘Smart City’

ORANJESTAD:  Recientemente Digicel Aruba a reuni cu AHATA pa combersa riba algun topico di interes general. Digicel Aruba ta miembro di AHATA for di 2018 y ta contento di por duna un contribucion real na Aruba su industria turistico. Durante di e reunion, sr. Lincoln “Dello” Gomez, Presidente di Digicel Aruba y sra. Tisa La Sorte di AHATA a combersa di temanan cu interes general, en particularmente e necesidad pa empresanan den industria turistico tin acceso na tecnologia, broadband y rednan fiber di manera cu nan por sigui eleva nan producto y servicionan. Entre otro temanan interesante, tambe a elabora riba regulacion, licencia, e ultimo desaroyonan den telecomunicacion y introduccion di Smart City na Aruba.

Particularmente, introduccion di un programa Smart City na Aruba lo tin hopi beneficio pa industria turistico. Digicel Aruba ta considera su mes masha agil den tema considerando cu ya esakinan ta programanan existente den otro teritorionan cu Digicel tin su operacionnan. Esaki ta haci cu e trayecto di implementacion por ta rapido y eficiente- tanto pa sector publico y priva. sr. Lincoln “Dello” Gomez,a indica durante di e reunion cu no obstante e ultimo desaroyonan y e discriminacion cu como empresa Digicel a experiencia toch esaki no a stop nan di mantene un posicion solido den mercado. “E desafionan cu nos a experiencia ta na desbentaha di e propio desaroyo tecnologico na Aruba; ta crea limitacion pa henter un pais y esey ta di lamenta.” Nos ta spera cu pronto tin resolucion faborabel riba esaki.