Travel Weekly recientemente a publica un articulo riba tur e inversionnan cu ta haciendo pa mehoracion di e Producto Aruba.
E articulo ta cuminsa na splica cu e exito di turismo, di un isla turistico, ta depende di e sosten di Gobierno, partnernan hotelero, inversionistanan, desaroyadornan, authoridad di aeropuerto, negociantenan y e amabilidad di localnan. Tin islanan tine miho cu otro aunke cada un ta depende tambe di atraccionnan local manera ta beach y atraccionnan historico y cultural.
Pa Travel Weekly Aruba tin e formula perfecto, mirando cu recientemente a inverti mas di 100 miyon Dollar pa mehoracion di hotelnan y di e experiencia di e bishitantenan. Den un entrevista cu Minister di Turismo Sr. Otmar Oduber, e ta menciona cu tin un otro 50 miyon Dollar ta riba mesa pa sigui inverti pa aña 2016. E mandatario ta bisa: “Tur sector ta mesun determina pa sigui mehora nos One Happy Island”
E articulo ta sigui menciona cu entre e inversionnan hotelero recien tin esun di Hyatt Regency Aruba Resort Casino & Spa’s cu a haci un inversion multimiyonario pa marca su di 25 aniversario. Divi Resorts ta invertiendo mas di 36 miyon Dollar den 60 camber luhoso na Divi All-Inclusive y 135 suite adicional na Divi Phoenix. E cambernan di Divi Dutch Village tambe ta cla pa haya un cambio den look. Marriott Aruba tin planea pa inverti 20 miyon Dollar den e siguiente aña pa mehoracion y renobacion. Holiday Inn Resort Aruba a caba di completa un inversion di 20 miyon na renobacion y lo gasta otro 2 miyon Dollar prome cu e fin di e aña aki. RIU Palace Aruba tambe ta conta cu un inversion den renobacion di 25 miyon Dollar y lo habri su portanan e luna aki, mientras na banda, nan a caba di habri RIU Palace Antillas enfocando riba solamente adulto. Otro propiedadnan cu ta enfocando riba mehoracion ta Renaissance Aruba Resort and Casino, La Cabana Beach Resort and Casino, Tropicana Aruba Resort and Casino, The Mill Resort and Suites, Bucuti & Tara Beach Resort, Talk of the Town Hotel and Beach Club, Occidental Grand Aruba y Manchebo Beach Resort & Spa.
Adicional na e renobacionnan y mehoracionnan haci na e hotelnan, Aruba Airport Authority tambe ta enfocando na mehoracion di Aeropuerto Reina Beatrix. Esaki ta inclui WiFi upgrade den espacionan publico di aeropuerto, instalacion di kiosconan pa pasaheronan, 3 espacio nobo pa benta di cuminda, mehoracion di e espacio di yegada y mehoracion di e espacionan di VIP. Tambe AAA a anuncia un inversion di 100 pa 150 miyon Dollar pa mehoracion di Aeropuerto Reina Beatrix pa e proximo añanan nos dilanti.
E articulo den Travel Weekly ta remarca e hecho cu Aruba den aña 2014 a celebra e di 1 miyon bishitante cual ta 9.5% mas compara cu aña 2013. Pa e prome kwartaal di e aña aki Aruba a ricibi 294.411 bishitante cual ta 20 porciento mas cu e temporada di fin di aña, di aña 2014.
E articulo aki a hala hopi atencion pa esunnan cu ta pendiente di noticia riba rednan social y un biaha mas ta demostra cu Aruba su desaroyo turistico ta riba e caminda corecto.