Combina cu Dia Internacional di Derecho di Mucha

ORANJESTAD, Aruba – November 2015: E trabao di un nurse specialisa den Kinderverpleegkunde, esta Enfermeria di Mucha, ta trece hopi reto cun’e. Contrario na adultonan, un mucha mayoria biaha no por splica of expresa kico e ta sinti. E mucha sa cu e ta malo, e ta sinti malo, pero pa pone loke e ta sinti den palabra no tur ora ta posibel. E trabao di un nurse di mucha ta consisti pues pa un gran parti di papia cu e mucha y en general, observa e mucha, pa nan por comparti cu e pediatra kico nan a observa.

E departamento di enfermeria di Dr. Horacio E. Oduber Hospitaal e siman aki ta den “spotlight” pa cu e celebracion di Siman di Enfermeria di Mucha. A bira un tradicion cu e departamento ta cuminsa e conmemoracion di e siman riba dia 16 di november, cual ta e dia internacional pa reconocemento di nan trabao, y nan ta inclui Dia Internacional di Derecho di Mucha, esta dia 20 di november, den nan celebracion.

Daisy van der Biezen, “verpleegkundige coordinerende taken”, a splica cu e nursenan a cuminsa cu un misa riba diadomingo y riba dialuna a bay cine hunto. Riba diaranson nan ta bay disfruta di un cena y cantamento di Karaoke. E parti di informacion y educacion nunca ta haci falta y pa diabierna nan tin riba programa un charla cu expertonan for di Corsou, kende lo elabora riba e topico “Autismo”.

E team di Kinderafdeling di hospital ta uno chikito y nan ta traha hopi uni, continuamente nan ta pensando ta kico nan por haci hunto pa haci e estadia di nan muchanan ta uno mas placentero posibel, pero tambe mas cortico posibel, pa asina e mucha por bolbe mas lihe  bek den su seno familiar.