Willemstad, Di 8 pa 18 di aprel 2016 tin e di 31 MDS, Marathon des Sables, e kareda na pia mas pisá na mundu, ku ta tuma lugá den desierto di Sahara na Marocco. Dennis Janson, un finalista di Ironman Triathlon di Kòrsou ta un di e 1200 partisipantenan ku ta partisipá na e kareda aki.  

Marathon des Sables (MDS) ta un ultra maratòn di 257 km den shete dia, ku for di 1986 anualmente ta keda organisá den desierto di Sahara na Sur di Marocco. Ta konsiderá e maratón e kareda na pia mas pisá na mundu. E maratòn ta konsistí di seis etapa ku mester kore den 7 dia. E etapa mas largu ta mas ku 90 km i e otronan ta varia entre 30 pa 40 km. Kada aña di nobo ta determiná e ruta. Kada partisipante mester sòru pa su mes ‘rugzak’ ku kuminda, bibida, ‘slaapzak’, ets. E organisashon ta regla awa i kampamentu pa drumi. 

Durante dia temperatura por subi te ku 50 grado i anochi e por baha te 5 grado selsio.  Kada partisipante tin ku someté su mes na un èksamen médiko. Na punto final i postenan di kòntròl kada partisipante por haña entre 1 pa 3 bòter di 1,5 liter di awa i un ekipo médiko ta pará kla si tin mester.

Dennis Janson ta Direktor General di General Contractor Albo Caribbean, kasá ku Jimena i tin dos yu ku ta Hoover i Dominick. Deporte ta forma un parti esensial di su bida. Saka lo máksimo for di bo su kurpa dor di manehá un programa di training, uso di material, orario pa alimentashon, famia i trabou ta un reto ku ta fasin’é.  Tur esaki e ta hasi su mes sin un trainer. Ounke ku e la yega di partisipá i finalisá maratònnan i  Ironman triathlon den pasado, esaki ta su promé kareda di resistensia asina haltu. Mas ku 1 aña e ta preparando ku simannan di training entre 90 pa 140 km pa siman.

Mirando e karakter di e evento aki Dennis a skohe pa kore e kareda aki pa un bon kousa. El a buska lunanan largu ken òf kua instansia tin e mesun retonan ku e a skohe riba tereno di deporte. Den e kuadro aki el a haña informashon riba internet di personanan ku dwarslesi via Fundashon Alton Paas. Personanan ku dwarslesi tur dia tin retonan pa siguí i no entregá. Deporte i ehersisio te ainda ta nan alternativa pa traha na riba nan salú i mantené un kalidat di bida.

Dennis Janson ta biba den Caribe riba un isla presioso ku yama Kòrsou i ta hopi entusiasma pa e posibilidat pa representá su pais den un evento asina inkreible i famoso.

Dennis ta reta abo pa partisipá huntu ku ne den e kareda aki pa esnan ku tin dwarslesi.  Bo por hasi esaki, sea komo persona òf organisashon, dor di skohe un montante ku bo ta kontribuí ku ne pa kada km ku e kore. Komo persona bo por skohe entre fl. 0,10, fl. 0,25 òf fl. 0,50. Komo organisashon bo tin posibilidat pa skohe entre fl. 2,50, fl. 5,- òf fl. 10,-. Organisashonnan ku partisipá, por bini na remarke pa keda rekonosé dependiendo di nan kontribushon. Mas informashon por haña riba website www.dennistasupera.com. Otronan ku ta desea por kontribuí tambe ku un montante fiho. Dennis su motivashon ta bini di kada persona o instansia ku kontribuí ku kada km ku e kore.