Segun nos Senso, na aña 2013 un kantidat di 10.813 (9.3%) persona a bisa di ta diabétiko i e sifranan akí a sigui krese, i te ainda nos manera di atendé ku e malesa aki ta laga di deseá. Hopi biaha nos ta neglishá e manera pa atendé ku e malesa i/òf nos no ta komprondé e manera pa atendé ku e malesa di suku.

Luna di novèmber, den kua ta selebrá luna internashonal di Diabétiko, SOKUDI kier enfatisá e importansia i kon pa diagnostiká e malesa, prevenshon, kuido di e malesa di suku, i kon yuda eduká otronan riba e tereno aki.

Pa esnan diagnostiká ku e malesa di suku, esaki ta influensiá nan bida diariamente, di kiko nan ta komé i bisti, te kon nan tin ku kuida nan mes i nan famia. Nan Realidat di bida diario.

SOKUDI e aña aki, huntu ku Wit Gele Kruis i Fundashon Birgen di Rosario, tin algun aktividat pa yuda konsientisá nos komunidat tokante diabétis i ta organisá un diálogo nashonal tokante diagnostiká, prevení i kon kuida esnan diagnostiká ku e malesa aki.

Dia 14 di novèmber, Dia Internashonal di Diabétiko, lo tin un Diálogo Nashonal na Universidat di Kòrsou ku diferente stakeholder riba e tereno di kuido, miéntras ku dia 17 di novèmber lo tin un seminario ku diferente oradó den sala di World Trade Center. Tur dos aktividat ta grátis. Diabétis por afektá Tur Famia i ta solamente trahando huntu nos por yuda kambia nos mentalidat pa loke ta e malesa aki. Nos ta spera ku lo bo djòin nos den nos lucha pa empoderá, informá i eduká nos komunidat enkuanto e malesa aki.

Luna di novèmber ta luna di kolekta di SOKUDI i nos lo tin buzon na diferente kaminda i nos ta konta riba bo aporte finansieramente tambe.