WILLEMSTAD – 23 di òktober- 2013: Den kuadro di e kampaña di Dushi Hende resientemente Ofisina di Turismo di Kòrsou (CTB) a desvelá 2 billboard nobo. Riba tur dos billboard por mira miembronan di e Curaçao Culinary Team 2013. Ta trata aki di e tim kulinario ku na luna di yüni último a representá Kòrsou den e kompetensia di “Taste of the Caribbean” ganando diferente medaya di oro, plata i bròns. E tim ta konsistí di e siguiente miembronan: Adriyel Lourens, Carlos Anthonij, Ashohary Juliana, Shanot Ocalia, Glenn Kemp i Nadine Libier (kordinadó). E mensahe ku e tim kulinario ta para pe esta Servisio di Kalidat ta forma parti importante di e kampaña di Dushi Hende. Ku e kampaña di Dushi Hende, CTB ke konsientisá tantu esnan ku ta laborá direktamente komo indirektamente den e sektor di turismo riba e importansia pa duna servisio di kalidat. Duna servisio di kalidat tantu na nos mes hendenan komo na e turista ku tei di bishitá serka nos. Por atmirá e billboard nan aki na  Biesheuvel, direkshon di Emancipatie Boulevard i direkshon pa bai Banda Bou na man drechi, skùin enfrente di Martha Koosje. Kòrsou, ban sigui plama e mensahe ku ta Dushi pa ta Dushi Hende. Pa tur esnan ku ta aktivo riba Facebook kòrda ‘like’ e página di Facebook di ‘Dushi Hende’, www.facebook.com/DushiHende