WILLEMSTAD.- Orfeon Allegro ta kumpli riba dia 23 di òktober 2014, 46 aña di eksistensia; 46 aña Orfeon Allegro ta sirbiendo kanto na Kòrsou pa medio di e kanto koral. Ku hopi entusiasmo Orfeon Allegro, bou di direkshon di R Yankey, ta inisiá su temporada di selebrashon ku un charla fundraising titulá: “Balor di kanto koral pa ekonomia di Kòrsou” , orador di órden ta Dr. Steven Martina. Kumpliendo ku funshonnan kultural, edukativo, sosial i estétika un kor tambe por aportá na bienestar general di su pais. Pa medio di e kanto koral un kor tambe lo por kontribuí na ponementu di pan riba mesa den kas di nos famianan. E charla ta tuma lugá riba dia 25 di òktober 2014 na Sosiedat di Siegu (Pro bista) di 7’or i mei pa 10’or di anochi. Ban hasi Kòrsou e sentro den Karibe kaminda kornan internashonal i lokal pa medio di nan kanto koral ta topa otro i ta trese nan variashon di melodia i ritmonan nashonal /regional pa mundu henter. Pa mas informashon por tuma kontakto na 869-0520 òf 560-5790.