Colegio Sta. Teresita ta titula campeon pa di dos aña sigui

Durante luna di october a tuma lugar e competencia di trefbal escolar pa mucha muher den categoria B, entre e schoolnan di Enseñansa Basico cu a inscribi na IBiSA pa participa. Despues di a forma dos poule di competencia, e weganan a tuma lugar den Centro Deportivo Libertador Betico Croes na Sta. Cruz. Poule A a keda forma pa: Maria Goretti College, Colegio Bon Bini, Colegio Conrado Coronel y  Colegio Sta. Teresita. Mientras cu Poule B a conta cu participacion di Colegio Pastor Kranwinkel, Scol Basico Washington, Prinses Amalia Basisschool y Colegio Sagrado Curason.  Despues di e weganan di e prome ronda riba schedule, e dos prome schoolnan di cada poule a clasifica pa sigui cu e weganan di semi-final y final. E cuater schoolnan cu a pasa pa hunga e weganan aki tabata: Prinses Amalia Basisschool, Colegio Sagrado Curason, Colegio Bon Bini y Colegio Sta. Teresita.

Diabierna ultimo e weganan pa final nacional di trefbal escolar a tuma lugar. Den e prome wega di atardi a enfrenta otro e muchanan di Colegio Sta. Teresita contra esnan di Prinses Amalia Basisschool. Den e prome mita di wega e muchanan di Colegio Sta. Teresita ta domina y ta logra 5 punto contra 1 di Prinses Amalia Basisschool. Pero den e di dos tempo di wega, Prinses Amalia Basisschool ta reacciona fuerte y domina e parti di wega aki logrando 4 punto contra 1. Apesar di tur esfuerso, esaki no tabata suficiente pa gana e wega. E score final ta caba 6 pa 5 na fabor di Colegio Sta. Teresita cu ta pasa di biaha pa hunga e wega pa titulo di campeon.

Den e di dos wega ta midi forsa e muchanan di Colegio Bon Bini contra esnan di Colegio Sagrado Curason. E prome tempo di wega tabata basta pareu y ta termina cu score di 3 pa 2.  Pero den e di dos mita di wega, e muchanan di Colegio Sagrado Curason ta habri formal y ta logra gana esaki cu score di 6 pa 1. E score final di e wega ta termina 9 pa 3 na fabor di Colegio Sagrado Curason cu ta clasifica pa e wega final.

Wega pa 3er y 4to lugar:

E mes atardi a hunga e wega pa e di tres y di cuater lugar entre e muchanan di Prinses Amalia Basissschool y esnan di Colegio Bon Bini. Den un prome tempo basta pareu pa ambos banda, ‘half-time’ ta bay aden cu score di 4 pa 2. Mientras cu den e ultimo tempo, e muchanan di Prinses Amalia ta subi tereno decidido pa gana e wega y ta demostra tambe riba tereno ganando e wega finalmente cu anotacion di 6 pa 4 y ta finalisa e competencia di trefbal escolar categoria B pa mucha muher na di  tres lugar, lagando Colegio Bon Bini na di cuater lugar. Tur participante di Prinses Amalia Basisschool ta ricibi nan medaya di brons pa e logro aki.

Wega pa Campeon:

E ultimo wega di atardi tabata entre Colegio Sta. Teresita y Colegio Sagrado Curason cu a hunga pa e titulo di campeon. E dominio tabata total di parti di Colegio Sta. Teresita den e prome tempo di wega cu ta logra 6 punto contra 0 di Colegio Sagrado Curason. Pero den e di dos tempo esaki tabata diferente, ora cu e muchanan di Colegio Sagrado Curason ta reacciona pero no suficiente pa logra surpasa e 6 puntonan di Colegio Sta. Teresita. E wega ta termina cu score di 6 pa 3 y asina e muchanan di Colegio Sta. Teresita ta bay cu e victoria y ta titula campeon den trefbal escolar categoria B pa mucha muher. Tur participante ta ricibi nan medaya di campeon y e school ta ricibi e Copa Rotativo di Campeon. E muchanan di Colegio Sagrado Curason ta keda como Sub-Campeon y ta ricibi cada un nan medaya di plata. Pa Colegio Sta. Teresita, esaki ta e di dos aña consecutivo cu nan ta logra e titulo aki.

IBiSA ta felicita tur school cu a participa, specialmente e schoolnan ganador. Alabes IBiSA ta motiva e schoolnan y nan alumno pa sigui participa na e competencianan di Deporte Escolar cu ta wordo organisa pa IBiSA stimulando asina pa nan participa activamente y desaroya e parti deportivo den cada alumno, creando un actitud sano competitivo entre nan. IBiSA ta felicita y gradici e trabou di cada docente y tambe instructor deportivo di cada school cu ta haci tur esfuerso pa yuda nos muchanan.