Proksimamente pueblo di Kòrsou lo hanja chens di disfruta di un programa nobo den panataya di Telecuracao. Ta trata di “Den Bon I Den Malu” un gameshow kaminda parehanan ta kompeti pa wak ken ta bai ku un fakansi romantiko pa dos persona na Miami. Den kada episodio di mei ora dos pareha lo enfrenta otro den tres wega, kaminda nan mester akumula punto. Den e prome parti nan lo mester komunika sin uza palabra, den e di dos nan lo mester mustra ku nan por traha huntu, I den e di tres nan mester kontesta algun pregunta pa mustra ku nan konose otro miho ku tur hende. Pareha ganado di e programa final ta bai ku e gran premio.

For di awe parehanan di tur edat por inskribi nan mes pa partisipa. Via facebook di Den Bon I Den Malu I via mail na filmcrewcuracao@hotmail.com bo por manda bo datosnan pa bo inskribi. Un total di 16 pareha lo hanja chens di partisipa. E grabashonan lo tuma luga asina inskripshon sera. E show lo wordu graba na shopping mall Sambil I lo wordu presenta pa Cristy-ann Rojer, konosi pa su rol di Romy den e serie Djis un tiki Love. E gameshow nobo ta produsi pa Telecuracao huntu ku e tim kreativo tras di Djis un Tiki love, ku lo kontinua trese mas produkshon bou di e nomber ‘The Crew’. Aktualmente nan ta trahando riba diferente otro produkshon ku ta na kaminda. E gameshow ta priminti di bira algu great pa publiko plus e parehanan parisipante. Pa mas informashon check e facebook di Den bon i Den malu.