Riba diamars 16 di Februari SMAC a tene su ultimo reunion cu tur Stakeholders di e temporada di Carnaval 62. Den un ambiente ameno y positivo cada representante di Departamento por a trece nan punto di bista dilanti riba Carnaval 62, entre otro evaluacion di comunicacion entre departamentonan y SMAC, experiencia riba caminda y conseho pa mehoracion y of cambio. For di principio di su maneho di Carnaval, SMAC a mira e importancia di comunicacion continuo cu tur esnan cu ta forma parti di e aspecto organisatorio di Aruba su Carnaval, por bisa cu dos anja despues ta sinti un union y sentido común pa cu e resultadonan exitoso di e Fiesta mas grandi di nos Pais.
SMAC a tuma nota di tur puntonan cu a ser treci dilanti y sigur lo hiba esakinan den directiva di SMAC pa evalua. SMAC kier a haci uso di e oportunidad aki pa un bes mas manda su palabranan di gradicimento pa cada departamento y su representantenan pa nan sosten, conseho y positivismo durante full e temporada. Danki na DOW, Serlimar, Imsan, Rode Kruis, Cuerpo di Bombero, DTI y Departamento di Salud Publico. Un gradicimento special pa e Team di KPA di districto di San Nicolaas pa tur nan cooperacion y bon comunicacion semper. Aunke cu no por tabata presente den e ultimo reunion kier manda un danki tambe na Sra. Gordon, Sr. Soemers, Sr. De Mey, Sr. Lacle y Sra. Rasmijn di KPA. SMAC ta desea di mira e mesun cooperacion di tur stakeholders ora cu nan wordo jama pa cu e proximo temporada di Carnaval 63. Presidente saliente Sr. Randy Thiel ta desea tur hende exito desde awor pa cu e proximo temporada. Sigur di e manera aki, trahando hunto por jega na duna Aruba e Carnaval grandioso cu e merece.