Aruba Airlines ta organisa otro “Shopping Night” Ta bende pasashinan cu 20% di descuento

ORANJESTAD, Aruba – Januari 2016: E siman aki, specificamente riba diahuebs 14 di januari lo tin un evento cu sin duda lo tin hopi interes di publico, como cu Aruba Airlines lo bende su pasashinan na un prijs reduci den un “Shopping Night”. E evento ta tuma luga na nan oficina principal situa na Cumana, unda antes tabata Codemsa.

Durante e “Shopping Night” diabuebs awor Aruba Airlines lo bende pasashinan pa Miami, Panama, Santo Domingo, Corsou, Valencia y Maracaibo cu 20% di descuento, exclusivamente e anochi ey so, entre 7:00pm pa 10:00pm. Mester uza e pasashi entre 15 di januari pa 15 di mei 2016. Durante e anochi lo tin animacion di e bandanan BMW, D’Vibe y N’ Fuzion.

Na final di e anochi, tur esunnan cu a cumpra un pasashi durante e evento ta participa pa gana hopi premio. Ta corda tur hende cu pa por gana e premionan, mester ta presente na e evento.

Participantenan na cualkier parada di carnaval den e grupo TOB tambe lo participa pa gana un pasashi e anochi ey pa Miami.

A funda Aruba Airlines dia 31 di januari 2006 pero a realisa su prome vuelo dia 31 di mei 2013. E compania Arubiano tin su oficina principal situa na Cumana 69 aki na Aruba pero cu oficinanan di representacion na Panama, Miami, Venezuela y awor na Corsou y Santo Domingo tambe. Aruba Airlines tin un total di 300 empleado staciona na tur nan oficinanan den tur nan mercadonan. Na Aruba so tin 139 empleado den servicio directo.

Aruba Airlines ta bula cu avionnan nobo y moderno, Airbus A 320-200 cu un capacidad di 150 pasahero, parti den 12 pasahero Business Class y 138 den Economy Class. Aruba Airlines ta bula tur dia pa Miami na Merca, pa Maracaibo y Valencia na Venezuela, sin lubida 4 vuelo pa siman pa Panama, 3 biaha pa siman pa Corsou y tres biaha pa siman pa Santo Domingo.