WILLEMSTAD – Djaweps ultimo representantenan di DeliNova i PlantLab a bishitá Curaçao Medical Center (CMC) ku un propósito úniko. Kumpliendo ku nan responsabilidat sosial komo empresa lokal a hasi un donashon di nan promé kargamentu na CMC. Durante di e bishita aki a hasi entrega di 200 paki ‘Cherry Tomatoe’ i 200 paki di blachi di Menta na e personal i boluntarionan.  Ámbos produkto produsí na PlantLab ta konta ku e máksimo na balor alimentisio i ta keda produsí ku 95% ménos awa den komparashon ku e sistema konvenshonal. Di akuerdo ku Berry Wouters di DeliNova, “Algun dia pasá nos a para ketu na Salú Mundial (World Health Day) i e diferente esfuersonan ku mester wòrdu hasí pa krea konsiensia riba un bida mas saludabel. E pandemia aktual i e boluntat sin igual di personal di kuido, a motivá tantu DeliNova i PlantLab pa hasi donashon di nos promé produkshon komo muestra di apresio.”

DeliNova a bin ta invertí den proyektonan ku ta balorá nos medioambiente i PlantLab na su turno ta deseá di hasi un impakto den e manera ku nos (mundu) ta wòrdu alimentá. E partnership entre e dos empresanan ta inisio di un trayekto interesante i e promé paso di un kambio hopi positivo den nos kadena alimentisio i distribushon di kuminda na Kòrsou.

Dikon DeliNova a skohe pa un partnership ku PlantLab

PlantLab tin e meta pa kambia e kadena alimentisio radikalmente. Nan ta hasi esaki dor di produsí na unda ku ta nesesario i den serkania di e konsumidó. Den un espasio asigná yamá PPU’s ta kosechá e produktonan. E presishon den esaki ta hasi ku nan tin hopi mas sabor i balor alimentisio. Banda di ku e produktonan di PlantLab ta èkstra fresku i dushi, nan tin un impakto positivo riba nos klima. Asina por menshoná ku ta usa 95% ménos awa, ta ekspulsá 80% ménos di C02, tin ménos desperdisio ku agrikultura konvenshonal i no ta usa pestisida. E meta di DeliNova i PlantLab ta pa den un futuro serkano produsí lokalmente.

E kolaborashon ku DeliNova ta resultado di un pashon kompartí. Ámbos empresa ta pensa ku ta un bon momentu pa laga Kòrsou sera konosí ku e produktonan aki. E kolaborashon entre DeliNova i PlantLab ta e promé paso pa un kambio positivo den e manera ku ta produsí kuminda na Kòrsou. Mester keda pendiente pa mas di e kolaborashon ku PlantLab i otro inisiativanan konsiente di medioambiente na e lokalidat nobo di DeliNova situá na Kaminda A.J.E. Kusters #3.